飲可樂，嚟嚟去去唔係揀可口可樂就係百事可樂，搞到呢兩大汽水廠巨頭都要不停出新口味吸客。即管睇睇全球有乜奇怪口味可樂，唔知你又試過未呢？

肉桂味（百事可樂）肉桂，平時多數加入咖啡同蛋糕，百事2004年喺美國及加拿大推出過肉桂味可樂，不過係限量版，都吸引咗好多人試，但有網友comment話似飲清潔劑。

櫻桃味（可口可樂）紫色罐身夠吸引，一開蓋已經聞到甜甜櫻桃味，但比傳統可樂甜，似飲緊沙士，全球多國都有售，包括香港大型超市都搵到佢蹤影。

Coca Cola Life（可口可樂）綠色版係標榜健康嘅可樂，一罐330毫升熱量為89千卡路里及22.1克糖，比一般可口可樂少三分一。甜味係由糖及甜菊葉天然提煉，有別於無糖可樂（Coke Zero）的代糖。早於阿根廷、智利及英國等推出，香港都有得賣，不過有可樂粉絲話甜菊葉得個甜字，冇乜可樂味喇。

薑汁味（可口可樂）呢款薑汁汽水，可以話係可口可樂首創嘅熱辣辣汽水，用四年時間開發，於2013年推出，將薑配合碳酸，唔使叮熱都變成熱飲。不過只得日本有售，冬天遊日本時不妨買罐暖暖身。

呍呢拿味（可口可樂）呍呢拿可樂味帶少少甜，有微微呍呢拿香味，曾經興過一時，但只剩番好少地方有得賣，香港仲幾乎絕跡。

Mojito cocktail味（百事可樂）雖然係雞尾酒，但呢款可樂完全無酒精兼無糖，飲落反而有啖啖薄荷及檸檬味，細路仔都啱飲。

乳酪味（百事可樂） 2008年喺日本推出嘅限量版乳酪味可樂，標明零卡路里，酸酸甜甜似益力多，好受OL歡迎。

冰極青瓜味（百事可樂） Lay’s薯片推出青瓜味hit到爆，百事都唔執輸，喺2007年推出日本限定嘅冰極青瓜味可樂，夏天飲爽呀！

Cappuccino味（百事可樂） 咖啡加可樂，怪呢！不過呢款可樂得東歐國家有售咋。

士多啤梨味（百事可樂）士多啤梨味可樂原來喺1991年已經開始發行，不過喺唔同區域有唔同包裝，口味都不停改變，2011年仲推出士多啤梨牛奶味。

同場加映︰Jats Takkola大蒜味可樂日本「大蒜之町」青森縣田子町嘅大蒜產量全日本第一，除大蒜雪糕及大蒜啤酒外，仲推出大蒜味可樂，其實即是將細磨大蒜加入可樂，有淡淡蒜味，實際同普通可樂無分別，你夠唔夠膽試？

轉載請註明來源：今天頭條