昨晚《城寨英雄》劇情精彩刺激，講述拳佬(陳展鵬飾) 及牙佬(袁偉豪飾) 與馮春美(吳家樂飾) 進行生死賭局，之後眾人更有連場大混戰！春美三名黑衣人手下火、雷及電武功高強，與福利會眾人不分上下，其中以阿電戲份最多，佢招「小李飛刀」更是兇猛凌厲！雖然阿電一直戴住黑超唔見樣，不過觀眾都成功認出佢！大家又認唔認得佢係邊位女藝人個老公？

劇情講到拳佬、牙佬在花曼(王君馨飾) 的協助下，終於在生死賭局中戰勝春美，春美輸咗即時發難反檯，派手下追殺福利會眾人，現場一片混亂！

春美三名黑衣人手下之一的「電」，隨即飛刀攻擊重傷在地上的拳佬，幸好刁蘭及時飛身用鐵鍊將刀擋開！

阿電窮追不捨，再度使出小李飛刀，今次到拳佬捨身替刁蘭擋刀！

中刀的拳佬依然攬實刁蘭唔放，於是阿電又再出刀，拳佬又中招！刁蘭當然感動非常。

雖然阿電飛刀好有型，不過最後都係棋差一著，被拳佬一記「猛虎硬爬山」爆頭，頭骨都爆埋！

呢位電先生雖然只係三位黑衣人之一，不過戲份奇重，一直追殺當拳佬刁蘭二人，先令拳佬可以英雄救美；亦有唔少近鏡大特寫，比其他兩人突出得多，所以觀眾都認出佢係邊個！

神秘阿電到底係邊個演？其實係「長腳蟹」呂慧儀老公黃文迪(Dickson)！Dickson昨晚呢個殺手角色一身黑衣、腰纏小刀，加埋戴住黑超，每次出鏡都霸氣十足！雖然出場時間唔算多，但都成功令觀眾留意到佢！

長腳蟹接受本刊訪問時就話《城寨》播放的時間多數要照顧小朋友，所以未有晚晚追看，不過佢都有上網睇番！仲搞笑咁話預告片中經常見到Dickson條腰！雖然Dickson戲份唔多，但阿蟹都好高興有觀眾留意到老公，佢表示對方其實都喜歡拍動作場面！不過講到《城寨》中最喜歡的角色，阿蟹就坦言係煎Pang啦！

轉載請註明來源：今天頭條