近排勁收得嘅《城寨英雄》，一班綠葉成為觀眾焦點。尤其是飾演小智嘅李日昇（Jonathan）更獲得網民激讚！見到佢俾人打到變豬頭，嘔住血都要去保護鑫鑫令到觀眾十分感動。其實智障角色真係唔易做，一旦做得唔好或演得過火就更加會令到人覺得討厭或者話你貶低智障人士，幸好以下呢班演員都拿揑得好好，今次同大家數下邊個最討各位歡心！

1. 劉松仁（方進新）《大時代》

講起智障角色點可以唔講《大時代》嘅方進新呀！無綫上年重播經典劇《大時代》，帶起一股深夜追劇熱潮，劇中演員個個都係好戲之人，尤其係劉松仁喺劇集入面嘅神級演技，佢飾演嘅方進新由一個聰明絕頂嘅股壇天才被丁蟹（鄭少秋飾）打到儍咗，搞到要疊報紙養家，但係佢疊得差畀老闆炒，之後仲要跪地求老闆「畀次機會」，呢幕震動人心嘅神級演技簡直睇到男人都流下男兒淚。有網民更指雖然劉松仁喺劇集入面得5集戲，不過都交足視帝級水平嘅演技。

查看相片

2. 郭晉安（丁常旺）《阿旺新傳》／《戇夫成龍》

郭晉安飾演嘅阿旺可以話係繼鄭則士飾演嘅肥貓之後，成為最入屋嘅特殊角色，佢首先喺《戇夫成龍》入面做搞笑、天真嘅丁常旺。由於節目大受歡迎，之後仲拍埋時裝版嘅《阿旺新傳》。兩次都為佢帶來視帝嘅殊榮，仲成功俘虜唔少師奶觀眾。唔知係唔係角色太深入民心，就算之後佢拍番正常劇都好「阿旺」feel。

查看相片

3. 李日昇（小智）《城寨英雄》

可能喺《城寨英雄》出街之前，你都唔知邊個係李日昇，不過佢今次做小智就一定令你印象難忘。其實六歲就已經入行嘅佢有唔少演戲經驗，今次喺劇集飾演勇敢、又有骨氣嘅練武弟子。雖然佢傻傻地，不過就算俾人打到爆曬缸，佢都仍然要保護弱小，仲要講埋：「強者係要保護弱者」呢啲催淚說話，搞到不少網民話見到佢都已經眼濕濕。

查看相片

4. 胡杏兒（丁善茵）《流金歲月》

雖然胡杏兒啱啱被網民選為最戲屎嘅視後，不過佢喺《流金歲月》飾演一名輕度弱智嘅女仔丁善茵; 雖然唔係女主角，但係就超級搶戲，仲獲得唔少好評，佢仲憑住呢個角色勇奪飛躍進步女藝員獎。

查看相片

5. 周家怡（哈皎皎）《花花世界花家姐》

女主角佘詩曼喺劇中飾演智商只有10歲嘅「花家姐」花麗珠，但係唔少網民都話佢演得唔似，仲批評佢抄襲阿旺。相反，飾演花麗珠好朋友哈皎皎嘅周家怡就被激讚。尤其係皎皎差啲俾人捉咗去影封面，佢見到佢爸爸（王青飾）之後就驚到喊嗰part，唔少網民都讚佢演得好自然，當時風頭差啲蓋過女主角佘詩曼。

查看相片

6. 蕭徽勇（輝仔）《實習天使》

Gordon哥哥喺《實習天使》入面飾演一名智障人士輝仔，佢無論行路、神情、說話，都完全演活咗呢個角色。就算鏡頭唔影住佢，佢都仍然出力演出，就好似香香同婆婆傾計嘅時候，佢都會突然大叫一聲，被網民讚完全係神來之筆。Gordon哥哥更被網民稱為係 TVB 最傳神嘅『神級「智障」演員』添！

查看相片

7. 王梓軒（唐榮）《華麗轉身》

王梓軒喺在《華麗轉身》中飾演阿姐汪明荃嘅囝囝唐榮，佢因為俾自己好大壓力，樣樣嘢都想做到最好，最終誤交損友同濫藥搞到有精神病。佢當時嘅表現都受到唔少網民激讚，話佢「頸筋都有戲」、「攞硬男飛躍」等等。而出名有要求嘅阿姐當時亦大讚佢嘅演技！

查看相片

8. 麥子樂（陳家俊）《雷霆掃毒》

麥子樂喺劇中飾演徐子珊嘅智障細佬，因為吸入過多一氧化碳而有後遺症，但係仍然得到家姐嘅愛錫，可惜最後慘被虐打致死。雖然戲份唔多，但唔少網民都大讚佢演得好出色、甚至連佘詩曼都讚佢「做得幾好」。

轉載請註明來源：今天頭條