里約奧運星期六終於開幕，今屆代表香港隊持旗嘅就搵咗「美人魚」歐鎧淳，果然不負所望，憑佢高佻嘅身型加甜美嘅笑容，令唔少外國網友都大讚「香港隊持旗手好靚女！」仲不斷嘗試起佢底。其實歐鎧淳Stephanie早已經係公記認嘅港隊美女，除咗游水之外，亦間中參與公開活動，亦有廣告贊助，及經常接受報章雜誌訪問。小編平心而論，Stephanie外表係的確非常甜美嘅，不過如果只係講樣，又未至於引起外國網人如此瘋狂，不過，只要加上佢運動員嘅身份就立即唔同曬喇！唔理係全職業運動員、業餘兼職比賽嘅運動員、甚至校隊運動員、及至鍾意做運動嘅女仔，女仔如果醉心於運動，幾乎係一定令人有良好印象，退一萬步講，如果一個女仔好鍾意做運動，咁佢都唔會「港女」得去邊。如果你女朋友都係熱愛運動，真係恭喜曬！

生活健康

鍾意運動嘅人，生活習慣雖然未必要好似港隊咁嚴格，但都一定會自律咁控制自己起居飲食，身體健康對佢哋嚟講係好重要，所以唔使擔心佢哋會夜瞓、勁飲凍嘢、夜蒲，佢哋自己反而緊張過你！

性格堅強

做得運動員當然受得苦，訓練並非常人可以想像，當中嘅痛同埋辛酸，不足為外人道，所以稍為欠缺毅力同堅持都一早被Foul唔會有好成績。同樣到鍾意某一種運動一樣要經過無數練習，呢種個性喺女仔身上更覺難得，睇住佢哋一副好似弱不禁風嘅外型，但又竟然可以抵苦呢啲苦，倍感我見猶憐。

熱愛戶外活動

好多男仔都有怨言，話自己嘅另一半好怕戶外活動，唔曬得又唔出得汗，怕熱怕蚊怕溶妝，所以假日活動只限於行街睇戲食飯，非常苦悶；反觀鍾意做運動嘅女仔一定唔抗拒戶外活動，甚至覺得出一身汗嘅感覺先係最開心！呢種動靜皆宜嘅特質令兩個人嘅圈子變得更大，拍拖生活更多采多姿。

運動以外無乜所謂

醉心於運動嘅女仔，尤其係只專注於某一樣運動，佢哋好珍惜好想做好嘅就只有呢樣運動，當然返工、拍拖同樣係重要，但某程度上佢哋要搵人生嘅成功感就必須從呢樣運動而嚟，所以佢哋通常對於運動以外嘅一切都無甚要求，食茶餐廳、著平衫，總之對男人嚟，有一個好簡單嘅形容詞：易養。

最Fit身型

回歸現實，作為男��邊個想自己女伴唔Fit吖，鍾意運動嘅女人身型一定保持到唔會太走樣，一身結實有線條嘅肌肉係送嘅，當然除非佢係健美小姐，否則都唔使太擔心。（誤！）更加可以令男士撇除自己女朋友由少女身型慢慢中年發福變肥師奶嘅擔心。不過大前題係，你唔可以介意佢全年365日都曬到好黑囉。

轉載請註明來源：今天頭條