唔好講笑，打工仔搵餐晏仔並唔容易，就好似返工返港島區，上年都仲講緊50幾蚊一個飯，依家冇60蚊你都唔使旨意行出餐廳門口。

如果你太古返工，Sorry，你冇70蚊都唔使旨意出街食。中環呢？差唔多90-100蚊喇。睇到呢度都想暈，之但係唔少人屋企都係「無飯一族」，放工返屋企更加唔想自己煮，唔同同事出去食又驚聽少左八卦野兼俾人話唔合群……咁可以點好？

依家就等扮工仔醒你幾招…

1. 懶sweet咁share飯食︰今時今日自私食一定係貴，反而可以氹下啲同事一齊share飯食，例如四個人叫三個餸、十個人叫八個餸，唔止可以多啲款式、均衡飲食，仲可以增進同事間友誼，埋單一刻除番開條數，仲有驚喜添呀。

2. 自己食咗早餐先，然後中午陪食︰香港人，早餐午餐當一餐食，已經好平常，依家各區茶餐廳，早餐都仲係30幾蚊，為左慳錢，不妨早啲起身食個早餐先，到下晝先再同同事出去「陪坐」吹下水。其實依家好多食肆都冇左「剩飲雙計」，只要你唔係標奇立異，一般齋坐或者痴同事個餐叫杯野飲，都過到關。

3. 扮細食︰午餐叫個相對平價碟頭飯或者炒飯，然後扮細食，加1蚊問侍應拎飯盒，帶一半飯返公司做晚餐，除番黎計，真係平左好多呀!

4. 呃蝦條食：同事去pantry叮飯，你扮出去偶遇，講到盒飯好溫暖好正，最終目的，係講到同事可以請你食。呢招好處係，你乜都有得食，就算同事開包蝦條，你都食得飽。

5. 等老細請食：平日唔同老細/部門主管都可能扮下親民請你食tea，嘗試計算同分析邊日最大機會有免費下午茶，你就一於唔食飯等佢請。

6. 終極一招，帶飯仲要share：公司有唔少同事帶飯，你可以建議一齊搞個飯局，然後你一於放幾條菜，去換走人哋塊雞扒。

轉載請註明來源：今天頭條