內含《哆啦A夢3D》劇透。全文以「叮噹」稱呼，因為咁先夠親切！
大雄一如既往都系一個冇鬼用嘅宅男，大雄冇鬼用真系人盡皆知。女主角靜兒就系一個口不對心嘅女人，佢當大雄系觀音兵咁收，呢邊廂扮好人憐憫大雄呢個宅男，另一邊廂又勾引潛力青年才俊出木杉。來自未來世界嘅使者叮噹，就好似盛女愛作戰嘅 Mei Ling 咁，接左幫大雄追靜兒呢個 project。
命中注定，靜兒系要許配比大雄呢個徹頭徹尾冇鬼用嘅宅男…
大雄完全系具有食軟飯嘅天賦，從來佢都冇努力過，習慣不勞而獲。佢利用叮噹嘅同情心，知道叮噹唔會見死不救，會幫佢。
大家對於靜兒要許配比大雄嘅同情，我真系好有保留…
靜兒根本就系身有屎，唔系點解一日沖咁多次涼。靜兒唔捨得爸爸唔想嫁，根本佢就唔甘心嫁比大雄。點解唔搵返出木杉？如果出木杉真系咁完美，佢會揀個比靜兒更好更後生嘅女人。而靜兒只系喺揀冇可揀嘅情況下，啃左大雄；佢仲要強調自己系聖人，憐憫大雄要照顧佢。
一直以來，我最鍾意嘅就系技安，如果我系靜兒，我一定揀技安…
咁多個卡通人物，技安著長褲繫著得最好睇，新戲技安換左佢條啡色運動褲，換左牛仔褲，仲卷褲腳，真系好有taste。相比起大雄同呀福，好人好姐，咁大個仔，我理解唔到大雄同呀福做咩著條咁鬼窄嘅短褲。
而鍾意技安最最主要系，佢一直都堅持自己嘅夢想…
技安從來都冇放棄過做歌手嘅夢想，佢冇放過任何一次演出機會。大雄結婚前夕去技安屋企開 party，技安間屋仲放左佢嘅個人CD 同歌衫，亦即系長大左嘅技安都有堅持佢嘅歌手夢想。
技安嘅真，其實好可取。技安好坦白，好直腸直肚，佢會因為唔洗考試包尾，有大雄墊底而沾沾自喜，比起個D 溫左書又扮唔識嘅同學，系唔系真好多呢。技安同呀福都系口賤嘅buddy，不停嘲笑大雄，靜兒同出木杉次次都走出來話唔應該蝦同學，真系好造作，恥笑下同學串來串去先真實架嘛。
技安嘅優點點止咁少，佢其實系個 family man，好尊敬媽媽，而且好錫佢個妹技蘭。
好多人話靜兒錯失筍盤呀福…
呀福咁狡猾，同佢一齊都搵唔到佢著數。呀福長期都做D 損人不利己嘅野，好似去旅行請哂所有朋友仔又唔預大雄，告發比技安知大雄話佢唱歌難聽，真系好一個仆街仔。佢日日炫耀自己，真系好似炫富嘅北佬。「食牛扒做早餐食到悶呀」，「Daddy 買比我架新搖控車好好玩但唔比你玩喎」，「我D 零用錢多到使唔哂都唔知點算好」，佢真系好難頂。
而如果我系大雄，我一定會揀技蘭…
大家外貌協會嘅成員只留意靜兒，其實技蘭真系一個好女仔。技蘭有才華，又錫哥哥，亦多次維護和平, 叫技安唔好蝦大雄。最重要系技蘭真系好生養，大雄同靜兒一齊，只生一個仔，但同技蘭一齊，系生左成個族群出來，可想而知，同技蘭嘅婚姻必定比靜兒快樂。
轉載請註明來源：今天頭條