首先利申, 自己無乜政治立場，但對共產黨一向憎厭。

我每日係深圳上班，每月會出差國內各大城市。今日係北京同客食飯，比其中一個北京佬問左一個問題：

佢話：我睇國足對香港場比賽，見到你地班香港人，噓國歌、話自己唔係中國人，究竟係咩心態？我去個咁多個國家、城市(條友係公司高層，見個世面)，未見過有人會噓自己國歌。

我答：你可以話大部份香港人都唔鐘意共產黨，排除大家既文化差異、思維方式等因素而言，單純對祖國哩個概念我相信大部份人本身都係愛國既，可以話叫做 愛國不愛黨。

於是佢又話：咁你地可以鬧共產黨、可以鬧習近平，但你地唔可以話自己唔係中國人！做人要認祖歸宗，哩個係不變既事實。(下刪一千字係講你地香港宜加幾唔掂，香港唔係大陸照已食得屎之類既野)。

其實我本來想講，我地有人噓國歌，某程度上亦只係否定共產黨，因為噓既人認為哩首國歌係共產黨套係中國所謂既國歌(其實我唔肯定哩樣野)。雖然你去過好多國家、城市，但你可能未去過巴賽隆拿，加泰隆尼亞既人係會噓西班牙國歌(其實係一般場合都唔常見)。

不過我最後我都無出聲，因為一講只會有排嘈，同我認同佢講既野亦有點道理。佢話香港靠大陸我亦無得好講，因為我屬於分享緊大陸經濟成果既一部份人。

其實近年中、港矛盾加劇，我已經唔止一次比大陸人寸(特別係越有錢果d)。香港人係大陸莫講無左以前果種優越感，宜加根本係班大陸人歧視我地哩班香港人

雖然我覺得佢地成班on9 比大陸既經濟成果蒙蔽到乜都睇唔倒好可悲。但諗深一層我自己又可嘗唔係咁？所以我先選擇唔出聲唔同佢嘈。

自由係無價，香港核心價值要守護。但我地哩班中港兩地跑既人邊有資格講哩d？

轉載請註明來源：今天頭條