圖片來源：網際網路

女人最討厭嘅，唔係小三，而係遊戲機，點解？因為好少男人會公然喺女人面前同小三親熱，但唔少唔識死嘅男人會喺女人面前同部遊戲機打得火熱，咁分明剃佢眼眉！如果你玩嘅係PS4就罪加一等，因為家用機阻住佢煲《太陽的後裔》。

最近PS4出咗個共享功能，一隻Game可以Share俾朋友玩，換句話說，大家買少咗好多Game！慳唔少！仲可以對戰協力等等！

當我同我個Friend好興奮咁講時，無為意原來女朋友就喺自己旁邊……呢鑊仆街喇，我已經做好準備用某個名牌包包去換取一部主機嘅心理準備，大佬啊！依家成日聽到乜嘢Division，乜嘢Dark soul……想玩好耐，我都想做被選中嘅細路啊！

點知女朋友好好聲氣咁講：「哦，你咪買囉。」

嚇？今日……四月十四號，愚人節過咗，我再三確定之後覺得自己條女好有鄭子誠Feel，有陰謀！

「BB啊，今日食錯咩……啊唔係，你又想買乜啊？我個又字唔係責怪你嘅意思……你明啦，你突然咁……咁體貼我，連PS4都肯俾我買，我有少少驚……喜嘛！」

點知佢笑得好甜咁話：「你買返去都無時間玩㗎啦，咪買囉。」

呢一刻，我感覺喺呢場愛情嘅遊戲入面，我輸咗，仲輸得好慘，佢俾我更了解我自己……

係，之前買咗三國志13，玩咗兩個星期，打咗兩個劇本，收皮；Monster Hunter X，我打爆咗村長任，棄Game；Dark Soul 2，打爆機嘅唔係我，而係我細佬……

我問我自己，如果有一個手制係我手上，我會揸幾耐？曾經，我會講：一萬年。但我知道，呢句承諾就好似男人吹噓性能力一樣，有心，無力。

或者我已經唔再係被選中嘅細路，袋住部暴龍機，我哋再無時間去冒險，因為你一邊Email緊，另一邊睇緊股票，轉頭又被老闆鬧，放工之後仲要買餸。有時間打機，我寧願瞓多陣……

唔知幾時開始，我買多咗Game，但打少咗機，為咗彌補當中失落感，我再買多咗Game，好似同自己講，買咗，就打咗㗎喇。

遊戲機，唔再係女人嘅情敵，就好似女人覺得呢個男人唔會再有小三埋身一樣咁可悲。

如果遊戲機係女人，我已經愈嚟愈少同佢埋牙，望到裸女都可以好冷靜咁同佢講：著返件衫。

當我以為遇上奇蹟時，原來只係自然定律嘅軌跡。

轉載請註明來源：今天頭條