同佢拍拖一個月，一直都好sweet，樣樣野都好夾。

雖然我一向不重視節日，但剛一起的第一個情人節還是有點期待的，最起碼不用孤零零過。在大家第一次正式約會，我已向佢提過，節日不用送花送禮，不用去高級餐廳（雖然以我地嘅收入，應該負擔得起），可以慳d去酒樓吃中菜，美心中菜我至愛，稻香都ok，只要在一起就得，情人節，生日，平安夜，不要令我待在家中給阿媽問長問短就是了，試過情人節晚上工作，坐巴士回家，全車得我一個孤零零坐，連旁邊的男男都是拖住手的，感覺自己好可憐。

可是情人節前，我不斷暗示，佢都無主動約我。直至13/2晚佢打黎，問我聽日去邊食飯（即係無訂檯啦，唔緊要，我心諗一齊就好），我話，你話事啦，然後佢話可能要接機，爸媽去左旅行，跟住就急急收線話轉頭再打俾我，但最後都無打黎。

情人節當日，一直等，一直等到中午1:30才whatsapp我，都係問我做乜，掛住我之類，但無話去邊幾點出去，我阿媽就係咁問我今晚番唔番屋企食，幾點出去…唉，我真係唔知 。我唔想打俾佢，諗住唔知會唔會有d驚喜，費事打亂佢計劃。

到4點鐘佢終於打黎，我心急到喊左出黎，佢話5點黎接我，因為囉囉攣左太耐，心情唔太平伏，Anyway，我還是悉心打扮，化曬妝 等佢，估佢會揸車黎，車出車入，著少d都得啦，最緊要靚。

5點鐘，正在著鞋，佢打黎，心想到了叫我落樓，點知佢話要做埋d野，仲喺公司要遲多9個字。心情不好，掛了電話，脫了鞋繼續等。

5點45分，終於到了，落樓見到佢，罵了兩句咁遲架，等死人，然後去左停車場，上左佢車，佢就喺車尾箱搞左一輪，我心諗，真的有花收，太好了 。等左一陣，他端來了一個美心玫瑰花小蛋糕，坦白講，見到的確有d失望，他說花很貴，蛋糕可以食，情人節都是商家的鬼主意，我勉強話鍾意，然後叫佢將蛋糕放番入車尾箱，他沒有坐去司機位，反而過黎開車門示意我下車話打算在我家附近隨便吃個飯，我家附近都是茶記，嚇….

唔係far…

我下車，然後追問佢是否要接機，佢支支吾吾咁，最後話8點零鐘就要走，我忍唔住發難說，情人節只在我家樓下吃飯，兩個鐘就要走，番到屋企我點同阿媽講好 ，氣沖沖的，本來往家的方向走，但走了幾步還是回頭，其實我走得去邊，唔走可能仲有轉機呢。

於是行著，我口快快話，8點幾你搵第二個，走下場都得啦左。行下行下去到九龍城，一直無拖手，無乜野講。途中見到幾間似樣餐廳，佢望下餐牌都係無入，其實都係百零二百蚊一個餐。我問佢，一年一次情人節陪陪我不行嗎?

你阿媽有阿爸陪住，大可搭的士，幫佢地叫架車都得，或者帶埋我去接機，但佢話佢有諗過，但架車唔夠坐，佢架小車，四個位，可能唔夠放行理吧….

我無再問

走左半個鐘，大家都累了，最後入左去一間小泰國餐廳，吃飯時為左氣氛好d，我開始笑返，講下其他野，佢打電話去call車，人家話轉頭覆，佢好似好唔高興，之後佢話好唔開心我話佢搵第二個，我話我信佢，口快快咁講，同佢say左sorry，佢話大家當打和….

嚇…當打知???....我跟住話，你去接佢地啦，我自己去同朋友飲野，或者一個人去睇場戲就番屋企，佢問我乜朋友，我支支吾吾話總有d朋友無無聊聊喺出面，其實邊到有…我送左預先準備的禮物俾佢，一個信封，佢話番去先拆，裡面係我親手畫嘅coupon，準備請佢去一個溫泉之旅俾佢，畫左兩個浸溫泉，油曬顏色，畫左成朝，靚到可以攞出去賣架。

食完飯，8點幾，都無mood食糖水，途中佢無拖我，但行到無乜人嘅地方就攬左我一陣，行下行下就行到佢架車，佢無示意叫我上車，亦無人打俾佢覆佢call車d野，我只好話你去接佢地啦，我出去中環飲野，佢話兜埋我，我話唔順路，我話自己搭巴士ok,

佢話入左咪標同我行去巴士站，我話唔駛麻煩，跟住佢問我個蛋糕點算，我話唔通我拿住四圍去咩，之後我轉身就走，佢無叫住我，我都無回頭。

到十一點幾，佢whatsapp我一句」Babe…」，我12點覆佢問佢番左屋企未，佢1點幾覆我話番左，明知我在街遊蕩，點解唔問我去左邊，過黎接我呢…嗚嗚

之後，我無再覆佢，佢第二日都枕住有whatsapp下我, 都係叫嚇babe, 唔好嬲, LOVE U之類，一句sorry都無，打左兩次黎，我無聽。

我係鍾意佢，亦知道當街發脾氣唔岩（平生第二次，我自問EQ幾高，只有對住好鍾意嘅人生會失曬平衡），都知佢好忙做野辛苦，但情人節話去接機賴低我一個，架車唔夠坐，我要下車，最後自己孤零零遊蕩搭巴士返屋企，我唔介意男人無車無樓，其實兩個人開心，一齊迫巴士都好開心，但我好介意咁樣俾人掉低，就算真係要做孝順仔，事先都同我講聲呀，等我有個心理準備呀。剛開始第一個情人節都係咁，往後的日子點過，諗到呢到，我個心好難過

via：http://www.discuss.com.hk/viewthread.php?tid=24352045&extra=page%3D141

轉載請註明來源：今天頭條