曾經有人問過我，點解我會同呢個男人一齊咁耐？

我真係無言以對，真係唔知道點答個朋友，反反覆覆去問自己，得出既答案都係唔知道！

依家同佢分左手六年，我仲好記得佢個樣，佢性格，行為

唔係因為我喜歡佢，而係因為佢影響得我好深．．

佢叫阿偉

記得七年前，我初初出黎做野，只係做一個員工，同同事關係麻麻

有一日，同事問我去唔去遊車河，本住去玩既心態，我答應左

遊車河當日有好多同事出席，其中包括阿偉，同埋以前男友

我跟阿偉坐左同事部車，有講有笑，同朋友冇分別，仲有時一齊去吸菸

可能大家都食同一牌子既煙，所以都好岩傾

到左夜晚，我地去左一間便利店，買左一支酒

原本講好一人一半，但因為我太眼訓，飲左幾口就冇再飲落去

上到車，佢依然坐我身邊，我攬住佢隻手，休息左一陣，之後唔舒服而攬佢條腰

但其實我冇醉意，加上自己以前玩得好放，攬攬鍚鍚好平常，又加上太累，就訓左落佢度

漸漸天光了，我地一行人去到海旁休息

阿偉示意我地行開一下去吸菸

去到一個無咩人行既位，佢同我表白左，而我對佢都有少少好感，就答應左同佢一齊

當日同大隊分開左之後，就各自返家，阿偉送我去搭車

就係咁就一齊左．．．亦開始左一段唔愉快既經歷

第一次上阿偉屋企

當日我去完車河，就返左婆婆屋企訓覺覺豬

起身時就打比阿偉，仲同佢講返去完車河坐車坐過龍既醜事

之後佢問我上唔上佢屋企作客食飯

我諗都冇諗就答應左，但係唔識去佢屋企，於是就要求佢黎接我上去

佢冇黎到接我，只係教我點樣坐車上去

於是，跟住佢所講既方法坐車，沿路一邊講電話，一邊坐車

好快就到左佢屋企樓下

上到去就見到佢爸爸，禮貌上都要叫佢爸爸一聲做叔叔

但因為早左上去，就叫左阿偉一齊落街行下

到左差唔多食飯時間就上去，佢地係客家人，有時會做一些客家菜

因為好新奇，所以覺得特別好食

食完飯，我地同樣落左街行左一陣

就係呢個時候，我問阿偉」我上黎你係咪好開心呢？」

阿偉」係呀，一見到你就好想攬住你，但係爸爸係度就冇做到」

之後我夠鐘要返屋企，阿偉就問我想唔想留係度住一晚

但我都答應左

到左夜晚，仲一齊落街食宵夜，好多街邊小食

食到好飽．．．

我地傾左好多野，原來佢未拍過拖，未有性經驗

而我已經拍過幾次，但一直都未有性經驗

當晚我地一齊訓，問到我幾時會比第一次佢，我就求其答佢」半年後啦」

就係咁，大家都好快訓左

但因為一個答案，先發現原來佢為左答案而一齊咁耐

可能大家會話我好蠢，我認我當時好蠢，依家諗起都覺得好蠢

半年後．．．

自從當日第一次去阿偉屋企過夜之後，我甚少返自己屋企

幾乎日日都去左阿偉屋企訓，可能因為咁而了解佢多左

佢屋企重男輕女，加上屋企就只有佢一個男丁，屋企人都好偏愛佢

就算佢家中仲有兩個妹妹

可能甜蜜期未過，就算佢做左自己唔喜歡既事，都可以好快忘記

記得有一次，我未出糧，身上既錢唔多，落到去超市掃左百幾蚊小食

於是開聲問佢借

我：「你幫我比住錢先，可以嗎？」

佢：「點解要幫你比住先？」

我：「我未出糧呀！冇錢比」

佢係十分唔願意之下幫我比左，沿路返屋企聽到佢不停咁話

「買咁多錢都唔知做咩」

去阿偉屋企訓，要付出既代價就係幫佢屋企洗碗

就算有幾唔願意，只要係度食，就要幫佢地洗

同阿偉傾，佢唔會體諒我，甚至講出令人心灰既說話

「叫你洗碗係咪好難為你？你係度食就要洗碗嫁啦，咁唔鐘意咪走囉！」

算！都忍到你！大不了我返自己屋企

於是，我日日都借返屋企拎野/ 沖涼為理由而返屋企

情願日日出街食都唔返去食，但依然係阿偉屋企過夜

話咁快，轉眼就半年

拍左咁多次拖，呢次係第一個半年

我已經唔再去阿偉屋企住，而阿偉就搬左入黎我屋企

但佢搬入黎之前，已經辭左現有既工作，直到搬入黎時都係冇工作

而我媽媽因為我返屋企而好開心，所以都希望阿偉會對我好

就幫阿偉搵左份工，做侍應

阿偉更加希望留係我屋企，係因為我屋企同佢公司好近

可以慳唔少車錢，而且工時長，住係我屋企，佢可以訓耐少少

一齊左半年，知道佢係一個放假情願訓都唔出街既人

返左新工之後，就更加唔會出去

直到有一日，佢放假，問我出唔出去行下

我好開心咁答左「好呀！」之後仲買送煮飯比我食

第一次食佢整既野食又要付出代價

呢個代價對我當時黎講，真係唔重要！

因為我喜歡佢，我愛佢！

（ ～ 待續 ～ ）

轉載請註明來源：今天頭條