男朋友打兩份工，由朝做到深夜，每個月大約第三星期就無錢，要問人借錢過生活，我成日都問點解成日咁快用完，每個月都有唔同解釋，屋企開支大/親戚過身/結婚去飲/比錢屋企睇醫生。我知佢有賭馬賭波習慣，佢話去賭係為生活，唔係無錢搭車食飯交租，同佢講應該用儲錢方式嘅道理，佢又做唔到。

佢知我唔鐘意借錢比佢，唔會問我借。我地拍拖消費唔高，一個月拍拖見面只有三四次，佢無錢就無得見面，我話我出錢去玩佢又唔想。當佢籌唔到錢，連搭車都無辦法出黎，就話想靜下，自己諗下辦法，所以有時一個月裏可以完全無見面。

我唔介意男友窮，就算去茶餐廳，麥記，去公園散步，無名貴禮物收，甚至情人節我出錢都唔介意，平平淡淡兩人可以一齊已好滿足，問題窮到每個月要籌錢過生活，佢又無儲蓄習慣，將來結婚後點算，以後一齊住所有生活開支我負擔？愈賭愈大點算？要日日擔心總有一日佢會走佬？屋企/朋友知道嫁咗無錢佬會點諗？日做夜做得個桔，佢捱壞身體點算？成日都諗無將來仲值唔值得一齊？

現家一齊兩年多，佢無進步有退步，生活愈黎愈差。要同佢溝通都傾過，要分手都講過，仲可以點。

就算相愛又如何！

轉載請註明來源：今天頭條