大家好！

我同男朋友兩個拍拖拍左三年半，話長唔長話短唔短，但到目前為止我都覺得我地嘅相處方式都算係幾健康嘅

見男朋友打緊機，我又未眼瞓，想分享下自己同男朋友拍拖既「潛規則」，其實都係啲老土野，大家有時間咪聽我廢噏下

唔隨便講分手

喺拍拖嘅初期我哋已經講得好清楚，我哋鬧交鬧成點，都唔可以用分手嚟做意氣說話，一講，就係認真講，所以一直以來萬一真係鬧交都會抱著一個我哋遲早都會和好嘅心態，盡量針對同解決個衝突（盡量），當你相信呢個只係關係上一個小衝突嘅時候就唔會失去理智，出言傷害對方。

只要嗰件事對方知道左會唔開心嘅，我背後都唔會做

對於我哋嚟講，只要對方唔鍾意嘅事，就算佢唔知道嘅情況下我哋都唔會去做，但呢件事唔係要去強迫對方去做，亦都唔係要check住對方做咗啲咩，係要自律，要求自己忠於你嘅另一半，呢個係雙方對自己嘅鞭策。

唔為慶祝而慶祝

我哋都會為對方預備驚喜，亦都會送禮物，但唔係因為某一個節日或者某一個日子而咁做。見到一樣野覺得適合對方就去送，心血來潮想氹對方就俾個surprise。

數算對方為自己做過嘅嘢

唔可以當對方為你做嘅嘢係老奉，簡單至一齊出完街，都可以send個WhatsApp多謝對方陪左你一日，因為我覺得喺感情上付出其實唔難，只要對方收到我嘅心意，我會覺得一切都好值得。

轉載請註明來源：今天頭條