有好多姐妹一講起男人去嫖妓，就會露出鄙視神色，一定會覺得個男人好鹹濕，好污糟，又或者係溝唔到女，係變態。但之前睇到啲研究，非正式統計發現香港原來有十萬至二十萬名性工作者。嘩，如果無需求邊度有咁多供應呀？咁香港咪有好多又變態又鹹濕嘅男人？

如果你直接問男人有無去過嫖妓，好多都會話無，但又會話身邊有朋友去過，咁究竟係咩朋友就真係唔知啦。坦白講，我春露小姐明點解啲男人會嫖，但唔代表接受到另一伴瞞住自己去嫖，因為如果你覺得我有咩滿足唔到你咪同我講囉，做咩要瞞住我呢。咁究竟男人點解要去嫖呢？

1. 要出火

生理需要真係最直接嘅原因。單身男人搵唔到另一半又或者唔想浪費時間去搵一夜 情，方便快捷就係去嫖。你可能會問香港嫖犯唔犯法，其實係香港做一樓一係唔犯法嘅，不過當中有好多其他周邊法例令到呢行好易觸犯法例，不過作為顧客係唔怕被人拉嘅，最多叫你協助調查啫。不過除咗單身人士，好多已婚人士都會去嫖，因為佢地覺得耐咗無咗激情，又或者有小朋友無時間做，好多女人結咗婚生完仔就將全副心機擺哂落個細路度，結果就冷落咗另一半；又或者另一伴根本唔想做，你知啦，香港地工時長，返到屋企咩心情都無啦，結果無性關係令到好多男人都身癢手癢下面癢。

2. 高人一等

唔好理有無將女性商品化先，但係你去嫖，你係客人，可以逐項要求講清講楚，想點做想點玩，唔洗怕醜唔洗怕尷尬。有啲男人話覺得將下面塞落女朋友度好似好唔尊重佢，而對方又唔係好想做，所以會去嫖。咁又真係有好多姐妹覺得做 愛係男人嘅享受，女仔係蝕底個個，心態上係「我畀你」咁，姿態高過男人，所以男人去嫖就可以企返高少少啦，有返啲大男人感覺。

3. 學嘢

攪得野多唔代表你識攪野架。性工作者一日要攪咁多野，見咁多人，一定識好多絕技。所以之前聽聞有夫婦一齊搵性工作者教路，希望過幾招畀佢地，增加情趣；又聽過有女朋友投訴男伴不解情趣，男方去搵性工作者學嘢，結果成功挽救關係，最後仲拉埋天窗添。所以話，識得問，係可以令你長知識的。

4. 搵人傾計

聽過好多個案都係啲男人入到去就同個姐姐仔咩都講一餐，講屋企講工作講感情，好似朋友咁。可能係日常生活真係有好多野唔可以同身邊人講，佢地要搵一個地方吐下苦水，去解決生理需要同時處理埋心理情緒。

嗱，寫咁多野唔係想幫男人解釋啲咩，不過係想講一個巴掌拍唔響，一個男人去嫖除咗鹹濕外可能都仲有其他原因，生活中嘅不滿足令佢有需要，但唔代表可以瞞住另一半去嘅。宜家咩世代呀，有好多嘢都應該坦白拎出嚟講。不過當然，如果姐妹要男人坦白，都要睇下自己係咪真係有畀過空間對方嘅。又咁講呀，好多男人會將性、愛、婚姻分開嚟睇，咁姐妹們要問心，你地接唔接受到，你地中間個分歧係咩，可以點處理。兩個人相處唔同淨係得飲飲食食咩，兩個人嘅價值觀要差不多先可以長久嘅。

轉載請註明來源：今天頭條