新加坡、香港連番惡鬥，不時都有報道指香港比星洲輸蝕。不過，「葡萄還葡萄」，港人長住新加坡，仍然有辣有唔辣。

現年30歲的港人梁頌煒（Rocky），四年前與朋友夾份開牙醫診所，今年已成功於當地置業做業主，「我覺得新加坡上車希望比香港大。」簡單一句已刺中香港人死穴。

澳洲畢業的Rocky之所以留在星洲發展，完全是因為當地「精英制」政策使然，「香港其實唔係好歡迎我地返去做野」。他解釋，海外牙科畢業後，回港執業要再考專業試，專業試的難度亦高，「新加坡係好歡迎外國專業人士過嚟做嘢，所以就過嚟新加坡做。」

單身的Rocky，坦言香港有港女，新加坡同樣有坡妹，但程度上，後者未至於港女咁嚴重。「坡妹，有時都唔錯，一部分啦!香港女人有時會比較物質主義。」「坡妹是否要有樓先結婚？新加坡有樣好，就是較易上車。首期唔使俾，係你的公積金裡扣除就可以。」

人在異鄉，首要解決住宿問題。新加坡樓價於2009年中起狂升，至2013年見頂，累積升幅超過六成；不過，升幅再勁仍平過香港。Rocky現時租住的單位，面積近900呎，望無敵球場景，月租3000新加坡元，摺合約1.7至1.8萬港元，即呎租20港元。他透露，最近已於新加坡中產區武吉知馬（Upper Bukit Timah）買樓，呎價約1300新加坡元，摺合約7000港元。

香港單位實用及建築面積相距大，不過Rocky指，「新加坡買樓，面積上唔會點呃你。」實用及建築面積相差不遠，亦基本上不可能出現香港「不能坐的馬桶」此類神則，「全部啲則都計得好準，就算你買樓花，出去睇啲則，全部地上啲Line，都有曬啲牆係咩位，窗花突出係幾多，全部都講得好清楚，比較少啲收樓有問題。」

不少男士，人到三十，有屋仔之餘，亦想玩車仔。不過身於「家長式管治」的新加坡，雖然比香港易上車，但買車，卻貴到飛起！「香港買樓，你都叫做有嚿塼，新加坡買車，你好似倒錢落海係覺得好唔值得，直程唔係一個投資。」

於新加坡要買車，首先要向政府申請「擁車證（COE）」，持證人擁有與使用新加坡道路，為期10年的合法權利。需求高時，COE的成本可能超過汽車本身的價值，最新一張COE大約價值30萬港幣。

轉載請註明來源：今天頭條