科技界亦都值得回顧一下。但系得我講慨話，梗系唔夠專業，早排《時代雜誌》就選出咗2014年慨25樣最佳發明，啱曬而家拎嚟重溫。
不過，老老竇竇，25樣發明當中，有啲無疑係眾望所歸，但有啲喺全世界網站轉載嗰陣，都話搲曬頭唔明點解會入選，我就覺得第25名最令人O嘴喇。以下由第1位數到第25位，睇嚇大家最認同邊樣、又最唔認同邊樣？
第1位 懸浮滑板
Hendo公司發明用磁力浮起離地慨懸浮滑板Hoverboards，之前我哋都報道過。好懷疑上榜原因就系食正《回到未來續集》話2015年會有飛行滑板條水，不過呢塊Hoverboards要下年先會正式推出。
第2位 印度火星飛船探測器
上榜理由系因為印度只系用咗7,400萬美金就整到呢架飛船探測器Mangalyaan出嚟，仲要第一次升空就完成任務，其他航天大國從未有咁慨成績。
第3位 小型核聚變反應堆
美國航天公司Lockheed Martin研發出新慨反應堆技科，仲話10年內可以將核聚變反應堆縮細到一架貨車咁慨size。唔知幾時可以變到Iron Man心口嗰個咁大呢？
第4位 無線充電
美國科技公司WiTricity改良慨無線充電技術，可以相隔2.4米幫電器充電，實用好多喎，抵上榜！
第5位 全能3D印表機
其實唔系新發明，不過今年3D印表機技術更加成熟，近乎print乜都得咁滯，而且應用範疇愈嚟愈廣泛。
第6位 Apple Watch
堂堂Apple點可以冇嘢上榜，iPhone 6選唔落手，就選Apple Watch啦！不過只表又系下年先出喎。
第7位 Blackphone
唯一上榜慨手機，系美國廠商專為保護隱私而設計慨呢部Blackphone，聲稱已經移除曬所有泄漏資料慨程式，唔知各國元首買咗未呢？
第8位 Coolest Cooler
美國公司設計慨派對用冰箱，除咗冷藏功能，仲內置埋攪拌機、LED燈、USB充電器、藍牙喇叭。系就系幾多功能，但未至於系最佳發明呀話？
第9位 駝背提示器
美國公司發明慨Lumo Lift提示器，當你條頸同脊骨做出駝背等不良姿勢慨時候，佢就會發出聲響提你矯正。Well，值唔值上榜就見仁見智喇。
第10位 BMW i3
BMW i3每次充電3粒鍾，就行到113至177km，實用性強，再加埋其他新式節能設計同操控方式，一改世人對電動車慨不良觀感，所以上榜。
第11位 Microsoft Surface Pro 3
大家都知系乜嚟，但應該冇乜人認同值得上榜。或者更加要問，有幾多人諗過用同買？
第12位 Ringly智能戒指
成日話穿戴式智能裝置系今年大熱gadget，咁又點會得只Apple Watch上榜咁少？仲有呢只能夠顯示訊息、又識震又識著燈慨Ringly智能戒指。
第13位 個人化電子藥盒
呢個Pillpack電子藥盒，除咗可以幫你妥善分開安放唔同藥丸，仲有附設app提你食藥，甚至幫你上網訂埋藥，系幾醒慨！
第14位 超級香蕉
澳洲科學家研發出維他命A含量超高慨超級香蕉，希望用嚟解決非洲兒童慨健康問題。「難為在遠方，饑荒吔蕉當豆苗。」
第15位 智能電動單車轆
劍橋大學研究員開發慨智能電動單車轆，可以充電兼自行轉動，作為任何車慨電動車轆，仲能夠透過app嚟調節動力。
第16位 手語翻譯器
手語翻譯器MotionSavvy UNI，能夠透過動作感應，將手語翻譯成語音或文字，造福聾啞人士呀！
第17位 伊波拉病毒過濾器
呢個過濾器Hemopurifier，能夠透過血液過濾慨方法，將病人體內慨伊波拉病毒過濾出嚟，從而收到治療功效。抗伊波拉醫護人員成為年度風雲人物，呢個過濾器冇理由唔上榜啫。
第18位 自拍神棍
無言。但調番轉頭諗，全世界都有人用佢，如果受歡迎就可以上榜慨話，佢都值慨。
第19位 節能冷氣機
GE同另一間美國公司Quirky推出慨節能冷氣機Aros，識靠GPS check你慨位置，然後自動開關，又識直接話你知用咗幾多度電，香港好啱使。
第20位 放鬆監房
上年美國俄勒岡州一間監獄入面，開始畀犯人喺自由時間入去一間叫做Blue Room慨房間relax嚇，因為入面慨牆壁會被投影出唔同慨風景影像，能夠減低犯人患心理病慨機會。
第21位 平板玩具
價值US$79慨平板玩具Osmo，能為iPad加上實體玩意，比凈系玩虛擬app，有益身心得多。
第22位 智能藍球
94fifty推出慨智能藍球，內置藍牙同9個sensor，識將運球數據傳返去手機度畀大家作為根據去訓練，香港都有得賣㗎！
第23位 可食用包裝紙
英國WikiFoods開發出用乾果同其他天然材料整成、食得慨包裝紙Edible wrapper，可以用嚟包芝士、雪糕之類慨食物，無論冷藏定加熱都唔會對包裝有影響，但最後能夠連包裝一齊擺入口。
第24位 電子藝術相架
22x13吋大、專用嚟顯示藝術品慨電子相架Electric Objects，除咗聲稱像真度高啲之外，我都唔知有乜特別。
第25位 IAmElemental Figure
呢set 7隻叫做IAmElemental慨女hero figure，真系令人搲曬頭唔明點解會入選。《時代雜誌》贊佢哋畀咗女孩一個幻想，女孩都能夠拯救世界咁話喎，我就想問其實《TIME》系咪收咗錢呀？
讀完記得留言你的意見哦！謝謝！
更多精彩好看的,請like我們的page：
↑點擊這↑ 謝謝點贊✓感恩
文章來源: https://www.twgreatdaily.com/cat37/node955043
轉載請註明來源：今天頭條