適中字型 較大字型

林文龍就同郭可盈噚晚帶埋囡囡出席趙曾學韞生日派對，文龍與可盈一齊訪問，嚟緊佢哋個女6歲生日，可盈話個女好乖唔會扭計買嘢。

咁會唔會幫個女搞百萬生日派對？林文龍就話：「唔好咁誇張，細路仔唔好focus喺錢度，希望佢享受童年。」到時會唔會請熊黛林出席？可盈話:「睇嚇佢到時喺唔喺香港，佢嗰段時間好似要飛。」

之前可盈一家同細佬郭可頌以及熊黛林一齊去旅行，系咪順便傾細佬同熊黛林慨婚事？可盈話:「未咁快，去旅行好開心，吃喝玩樂，冇傾乜嘢重要嘢。」

想唔想佢哋拉埋天窗？可盈話：「最緊要佢哋相處開心，佢哋自己決定啦。」新一年兩公婆有冇造人大計？可盈話:「呢啲嘢我冇所謂，最緊要睇林生。」

文龍就話：「咁我0依家要積極儲錢，因為0依家有兩個大小姐。」問天若想唔想做家姐？天若就話：「唔想，我想要哥哥，我想做妹妹。」不過，可盈靜靜雞話天若其實好鍾意照顧小朋友，想要個妹妹或者小朋友喎。

郭可盈同囡囡咀嘴曬溫馨。

林文龍表示唔會為女兒搞百萬生日派對，又謂唔應該focus喺錢度。

車婉婉與老公都有出席趙曾學韞生日宴。

王敏德夫婦

名媛趙曾學韞噚晚喺灣君悅酒店，提早舉行71歲生日派對，廣邀各界好友一齊慶祝，包括現任教育局局長吳克儉、王玉環、毛玉萍、呂良偉同楊小娟夫婦、沈德寶莉、劉詩昆、葉童、車婉婉兩公婆、王敏德夫婦、蘇永康夫婦、林文龍同郭可盈跟囡囡天若等一家三口，以及關之琳護膚品生意拍檔Helen Ma馬梓詠，其間馬梓詠唔覺意露咗個乳貼出嚟添。

噚晚著名設計師何國鉦（Dorian Ho）幫趙曾學韞設計咗兩套晚裝，趙曾學韞話生日願望係世界和平，家庭幸福健康、子孫孝順，希望啲孫學業成績好，大個咗做有品格嘅人。問佢正日生日係幾時，佢話：「今日係預祝生日，正日係幾日後，我係慶祝舊曆嘅，舊曆係11月22（即明日），啲孫話今晚上台唱歌比我做生日禮物，啲孫好鍾意畫畫，之前收咗佢哋畫同花。」

收到乜嘢特別禮物？佢話：「阿女添多個外孫女，啱啱滿月，一個月零一個禮拜。我叫啲賓客唔使送禮物，有乜就捐去做善事，0依家啲孫夾埋有11個。」想唔想湊夠一打？佢笑笑口話:「咁就叫佢哋加油啦。」

講到新一年大計，趙曾學韞話會繼續做慈善:「一直搞慈善，嚟緊一年會多個範疇，希望成立一個退休護士組織，幫啲護士上門幫啲有需要人士。自己之前除咗幫啲兔唇同弱視嘅人，幫過好多山區小朋友，近10年都有返內地做慈善，基本上用咗自己3份2時間做嘢，剩番啲時間先去旅行。」有冇叫啲孫幫手？佢就話:「啲孫太細，但有時去醫院探訪，會叫啲孫做嚇義工，仔女都好支持，有捐錢。」

馬梓詠噚晚帶埋3歲囡囡Shyme到場，原來個女契咗比呂良偉，遲啲補擺儀式。佢話關之琳0依家唔喺香港，但問到離咗婚嘅之之近排心情點，馬梓詠就話：「唔講，個人開心就得啦！」馬梓詠話近日成日去宣傳佢哋美容產品，啱啱同之之去咗北京，之之聖誕都喺香港，但0依家走咗。會唔會希望之之快啲搵番個伴？佢就話：「感情隨緣，冇得夾硬，希望我哋個美容產品可以發展落去，中港台都會發展，農曆新年前應該會去埋日本同新加坡。」

趙曾學韞（右）提早慶祝71歲生日。

趙太善心爆棚，新一年大計都係繼續行善。

原來趙太已經有11個孫。

趙太與家人合照

呂良偉及太太楊小娟

呂良偉夫婦與馬梓詠及其女兒合照

葉童夫婦都有出席生日派對

蘇永康夫婦

文章來源: https://www.twgreatdaily.com/cat125/node820405

轉載請註明來源：今天頭條