佢哋第一次相遇，喺1989年，一個偏遠嘅郊區地方。嗰陣刀仔唔知面前呢個人就係大名鼎鼎嘅賭神高進，只知道佢係一個成人外殼、但細路心靈嘅小朋友，而且仲係一個非常非常非常腌尖、偏食嘅小朋友。
刀仔雖然唔係佛祖，但佢本著佛祖慈悲嘅心收留呢位小朋友，亦因一次賭局得知呢個小朋友識得變隻三仔出嚟呢啲旁門左道，自此佢憑住呢個小技藝贏到開巷，尤其當初贏九哥嗰一場，絕對係經典之作。
不過美夢好快完結，呢個小朋友終於醒返變返大人，但亦因為咁而唔記得咗曾經非常照顧佢嘅刀仔，就好似一段關係，女方被奪去初夜之後，就狠狠地被拋棄。那刻，刀仔欲哭無淚。
後嚟，高進知道一切都係賭魔陳金誠同佢細佬高義設嘅局嚟陷害佢。雖然後生仔係急進啲，但高進憑住一副上個月西德發明嘅隱形液晶體顯影眼鏡，加五百鋪摸戒指 呢個小動作贏咗隻老狐狸。就算巴拿馬總統同陳金誠有幾深交情都好，都幫唔到佢洗脫殺咗高義嘅罪名，因為出面唔係公海，而係大嶼山。當時刀仔都在場目擊一 切。
結局係有情人終成眷屬。當然高進唔係基，冇同刀仔發生超友誼關係，但高進其實冇忘記到刀仔對佢有恩，最後二人成為咗比超友誼更好關係嘅師徒關係－賭神與賭俠。
雖然後來日子各有各忙，刀仔亦識咗個朋友叫賭聖，後來佢仲成為賭神徒弟，不過一切都係後話。直到今日2015，事隔26年，高進同陳刀仔再一次同場出現，為進軍澳門而備戰。
▲日前劉德華化身陳刀仔，遇上周潤發化身嘅高進，二人喺北京宣傳新戲《賭城風雲3》
賭神與賭俠，一個經典場面。
▲左圖為1989年《賭神》劇照；右圖為2015年《賭城風雲》劇照
同場其實仲有一個賭場上熟悉嘅面孔，不過佢最近去咗驅魔。但回歸賭場又會回復以前面貌，但嗰陣應該叫佢化骨龍？無名？梁寬？澤西哥？定係地獄黑仔王李加乘？
▲張家輝於《賭城風電》系列飾演馬尚風一角
佢話：「我叫馬尚風，小馬。」
▲周星馳曾在《賭聖》系列飾演有特異功能嘅左頌星
如果你話加埋賭～～～～～～～～～～～聖左頌星，三師徒同場你話場面會唔會仲經典？可惜，當年嗰個星仔，已經唔存在了。
▲鄭裕玲曾在《賭聖延續篇：賭霸》飾演在魚市場逢賭必贏嘅「賭霸」
三叔表示：「唔好漏咗賭霸呀！」
轉載請註明來源：今天頭條