睇劇，奸角好多時比好人主角搶戲，更容易令觀眾留下深刻印象。所以唔少演員都希望有機會演一次大奸角，除咗可以考驗演技之外，分分鐘會大受歡迎添呀！除咗一定有陰謀慨「陰謀情人」鄭子誠之外，今日同大家重溫下千禧後仲有邊幾個奸到出汁慨經典奸角啦！

《雷霆掃毒》：黃智賢 飾演潘學禮

黃智賢憑住喺《雷霆掃毒》中飾演魔警潘學禮成功上位，有觀眾指佢比林峯更搶戲。當時甚至有網民喺佢微博上留言，叫佢唔好再破壞林峯同徐子珊慨「幸福」，證明佢好戲到令網民分唔清現實定系假象。「魔警」潘學禮奸到出汁，不過最後都無好下場，坐船潛逃時，被另外一位大毒梟炸死。

《與敵同行》：郭晉安 飾演唐立言

一向做開「好好先生」慨郭晉安憑住《戇夫成龍》、《古靈精探》等成為觀眾十分喜愛慨演員。但系喺2008年，佢喺《與敵同行》中第一次飾演表面正人君子、背後陰險慨唐立言。尤其系大結局中，半身癱瘓坐緊監，佢都仲諗住坐完監出去報仇，對住鏡頭邪笑，呢一幕真系睇到觀眾都不寒而慄，成為當時最受歡迎慨奸角之一。

《使徒行者》：許紹雄 飾演覃歡喜

許紹雄喺《使徒行者》入面飾演慨覃歡喜「歡喜哥」亦正亦邪，奸得來又夠善良，令到好多觀眾都嬲佢唔落。佢喺劇中陰陰嘴慨笑容，完美演繹出嗰種「笑騎騎，放毒蛇」慨感覺，睇到好多觀眾心寒。但系佢個仔死嗰場戲，佢以笑表達悲痛又令到觀眾覺得好震撼。唔怪得當時俾人封為「男神」啦～

《溏心風暴之家好月圓》：米雪 飾演殷紅

米雪喺《溏心風暴之家好月圓》中飾演終極奸人Bob 頭毒婦殷紅。劇中佢恩將仇報做狐狸精，害荷媽（李司棋飾）夫離子女散，手段卑鄙陰險同心狠手辣程度連觀眾都刮目相看。

《富貴門》：羅嘉良 飾演沙富來

羅嘉良本身系劇中飾演一名心地善良慨老千沙富來，但系後來為咗名利、為咗成為卓家慨一分子，同卓一元（呂良偉飾）斗過你死我活！冒牌身份被踢爆之後，佢就綁架埋阿嫂同班仔女，可謂咩壞事都俾佢做曬！最後下場系佢自殺不遂失憶，返回沙巴生活。

《宮心計》：楊怡 飾演姚金鈴

喺《宮心計》中首次做反派慨楊怡，當時同佘詩曼、關菊英、米雪同惠英紅等展開連場後宮鬥爭。喺劇中佢為咗爭權逐利出盡陰招，例如誣衊高顯揚（鄭嘉穎飾）同劉三好（佘詩曼飾）有姦情、迫賢妃（李詩韻飾）飲滑胎藥最終搞到一屍兩命等等，睇到觀眾不知幾肉緊。

《鐵馬尋橋》：林嘉華 飾演榮德

林嘉華曾經憑《鐵馬尋橋》喺大馬頒獎禮獲得「我的最愛奸角獎」，咁大家就知佢做得幾齣色幾入戲啦！喺劇中榮德本來都好正常，但系因為佢好高騖遠又心胸狹窄，喺比賽前夕，一次過殺曬候荷花（姚瑩瑩飾）同歐陽彪（鍾景輝飾），佢殺人嗰一幕慨眼神真系睇到觀眾心寒。之後佢仲不停欺負顧家，做好多埋昧良心慨事。「青雞面」呢個角色去到而家相信仲有好多觀眾記得。

轉載請註明來源：今天頭條