早前女神Angelababy高調去到整形醫院做監定，最後證實佢並無做過臉部整形手術，困擾多年嘅整容傳聞終於告一段落！（我哋早前文章：Angelababy已鑑定冇整容！四哥講過：球證、旁證、足協…全部都系我嘅人！）

咁娛樂圈嘅八大「變形金剛」又系邊啲「男神」呢？

戒水戒油大變身：沈震軒

型男沈震軒出道時寂寂無名，後來被Paco睇中，之後一直平步青雲，仲愈來愈型仔！相比初出道時，沈震軒眼皮變深，放電冇難度之餘，連至hit臥蠶都有埋。而鼻樑亦變得又高又窄，同塊V面襯到不得了，比多年前出道時更似古天樂。對此沈震軒就話︰「我其實天生系雙眼皮，不過系內雙眼皮所以唔明顯，依家都系多用膠紙加深效果。」至於面形上嘅改變，佢就話︰「以前拍劇時成日食宵夜，食飽就瞓，所以面容腫脹。不過依家臨瞓前兩個鍾戒油戒水戒咸，將從小嘅習慣改變咗。」

襯曬楊怡：羅仲謙

謙謙初出道時輪廓已算突出，不過隨著人氣一直升，五官都愈來愈靚喎！首先天生嘅pizza面唔見咗，變成瘦削V臉。鼻翼由闊變窄，鼻樑顯得更堅挺，同女友楊怡個「木偶鼻」好匹配。加上依家成對眼勁有神，望耐一陣都俾佢電親！謙謙就話︰「我入行都已經有一段日子，樣唔同咗都系好平常嘅事。」不過佢就重申唔介意人哋整容，因為只系一種愛美嘅表現。噢咁唔怪得佢……

跑步瘦面：胡鴻鈞

歌手胡鴻鈞2010年於《超級巨聲2》奪得亞軍入行，向來賣歌喉唔賣樣嘅佢歌藝有冇進步就唔知，不過個樣就肯定唔同曬！由2010年嘅1.0方形面，進化到今時今日嘅V面6.0，被網民戲稱「削骨還父」，同哪吒一樣咁孝順！

其實對於削麵傳聞，佢曾經話︰「其實系跑步嘅成果，運動同節食雙管齊下，所以形象有所改變」。佢仲強調屋企人管得好嚴，根本唔可能整，否則會「俾阿媽斬死」！

神奇刀削麵：鄭嘉穎

年輕時嘅鄭嘉穎包包面，甚具福相。不過自從喺台灣返到香港後就神奇地發展為「刀削麵」，下巴尖一尖，而面部肌膚無鬆弛之餘仲愈來愈緊緻。對此嘉穎話自己後生嘅時候baby fat未除，仲出動證人︰「好在有同年出道嘅馬浚偉做證人，我果時喺台灣有錢都用曬去食飯同交租。」證明佢真系冇執過。咁即系嘉穎自己回春有術啦，難怪至索港姐陳凱琳都俾佢迷倒！

原來是美男：黃曉明

如果睇返海綿大哥以前啲相，佢嘅相貌可以話系十分平凡。眼細細，鼻子圓圓扁平，唔覺有咩星味。不過同唔少男星一樣，黃曉明嘅樣貌都系隨住人氣上升而改變。依家嘅佢眼睛大咗精靈咗，下巴尖曬，再加埋筆挺嘅鼻樑，簡直系男神嘅模範！最勁系連女神Angelababy都嫁埋俾佢，真系冇得輸！

對於樣貌上嘅改變，黃曉明就話聽到好難過︰「因為大家都只喜歡八卦新聞而非事實。」佢透露自己有段時間激減磅︰「我曾經重155斤，現在只有130斤左右。」，所以成個人都唔同咗，一切都是「減肥惹的禍」。嘩講到好勉強咁喎，不如變返以前咁好冇？

十年前後：劉愷威

雖然有個星級爸爸劉丹，不過劉愷威喺香港嘅演藝事業並唔順利，多年來喺TVB都系演閒角居多。於是佢05年轉戰內地，10年後嘅今日已經喺內地紅透半邊天，躋身一線小生行列，仲娶埋個索老婆楊冪。不過唔少觀眾就話冇見一排幾乎唔認得劉愷威，因為依家嘅佢雙眼變得炯炯有神，鼻變得挺拔有型，由當年帶點呆嘅薯樣進化成男神。雖然近年大家都對佢嘅外貌議論紛紛，但劉愷威都只系話︰「總之沒加過東西，也沒拿走過東西，沒開過刀，就是這樣。」既無承認亦無否認，一切交由大家自行判斷。

翻版炎亞綸：汪東城

台灣男藝人汪東城以組合「飛輪海」成員身份出道，初出道時嘅佢面形腫脹，不過依家下巴尖一尖，成塊面縮細咗咁。大細眼變電眼，扁平鼻子變得愈來愈高，愈來愈似以前嘅炎亞綸…點解系以前？因為依家嘅炎亞綸都已經去到另一個層次，直頭系韓國人一樣。大東就話︰「以前有水腫和baby fat，不過之後勤於健身，所以不單身材變fit，五官都變得立體。」就連佢所屬公司都曾經話大東只系受惠於現時精進嘅化妝技術，所以比以前上鏡。明白曬！

無敵黐膠紙：羅志祥

有亞洲舞王之稱嘅「小豬」羅志祥，出道時系單眼皮，不過近年雙眼皮愈見明顯，依家嘅佢簡直系擁有一對迷人電眼，仲有下巴都尖咗唔少。小豬就話︰「我都是用貼的」，原來系用咗雙眼皮膠紙嘅效果，呢幾年來系咁黐系咁黐，久而久之都變成雙眼皮。佢成日話自己工作太忙，邊有時間整，仲曾經表示話︰「我不想跨出那一步(指整容)，做了便不能笑別人。」所以真系唔可以睇少雙眼皮膠紙嘅威力！

轉載請註明來源：今天頭條