台慶劇《張保仔》講到保仔暗地裡向皇帝妹傾心，其實歷史提到保仔同義父鄭一關係非淺，有hehe之嫌，鄭一死後。。。
無線重頭劇《張保仔》喺剛過去慨星期一首播，由陳展鵬、洪永城同陳凱琳等主演，大玩穿梭時空之餘，仲用上號稱系史上最強慨電腦特技！卡士勁唔勁就見仁見智 啦，電腦特技亦都…不過以呢個香港人人都識慨人物做題材，相信點都有啲吸引力。張保仔慨大名雖然人人都聽過，張保仔洞都有好多人行過，但呢位人物真實慨事 跡就未必個個知。依家就為大家解構呢位傳奇海盜慨真實一面，認識歷史之餘又可以睇嚇大台劇集同真實歷史相差幾遠嘛！
雖然有斥資三千萬慨CG特效，又有陳展鵬同陳凱琳等大卡士，不過接連派膠以致評價麻麻。劇集中就有黃娣妹穿越時空，仲同張保仔以及旻皓譜出一段三角關係。而其實根據歷史，張保仔都的確陷入過一段三角戀…不過同嗰兩位虛構人物無關，而系佢同義父鄭一以及義母鄭一嫂！同性戀、同義父義母慨不倫戀呢啲情節，TVB就當然拍唔出，未俾人投訴過咩！
張保之少年時代
張保仔(1786年-1822年) 原名張保，新會江門人，清朝年間著名海盜。據知張保父母希望佢一直平平安安長大，所以命名單字一個「保」。而我哋廣東人喜歡喺男仔名後面加個「仔」字，「張保仔」呢個響噹噹慨大名就系咁樣得來。
張保15歲出海捕魚時為海盜紅旗幫首領鄭一擄走，不過鄭一欣賞佢慨聰明機智，所以就留佢喺身邊成為部下。但亦有一個說法系已經有老婆慨鄭一根本系一個雙性 戀者，貪戀得15歲、青靚白凈慨張保，兩人仲發生埋超友誼關係 (即系張保都系雙性戀) ；而另外張保又同鄭一老婆(後統稱鄭一嫂)搞埋一齊，發展出一段複雜慨三角關係。不過其後鄭一出海遇上颱風溺死，於是張保就堂堂正正勾義嫂，正式成為紅旗 幫揸fit人。
鄭一
劇中羅樂林飾演慨鄭一，同歷史上慨真實人物同名。鄭一，名文顯，系海盜首領鄭連昌慨長子，故取名「一」。佢的由祖先起多代都系海盜，系名副其實慨海盜世家。鄭一所領導慨紅旗幫系聯盟中勢力最強大，而且佢高瞻遠矚，促成了廣東海盜的聯盟。
佢會將俘虜慨漁民收為部下，其中張保仔就系出海捕魚慨時候被鄭一捉走。不過史實慨鄭一就唔似得羅樂林咁一心愛錫張保仔，原來佢系一名雙性戀者，有老婆慨同 時又貪戀年輕俊俏慨張保仔，咁張保仔喺唔知自願還是威迫之下同義父發展一段同性戀…所以話張保仔上位快除左因為佢本身慨才幹，仲要靠呢段超友誼關係…
另外，歷史上鄭一死時只系約42歲，所以同羅樂林(今年66歲)慨形象其實有段距離。咦咁即系羅樂林又要死？不過今次都唔會一日死5次慨，都冇咁慘…
「鄭一嫂」石香姑
劇中邵美琪飾演慨石嬌系鄭一慨老婆，相信就系「鄭一嫂」石香姑，系歷史上最出名慨女海盜之一。
鄭一嫂原名石陽，乳名香姑，本來系一名蜑戶妓女，後來嫁俾海盜頭目鄭一，於是後世一般只會稱佢為「鄭一嫂」。石氏雖然系青樓女子出身，不過聰明機智而且獨具慧眼，嫁俾當時只系小頭目慨鄭一，從此踏上海盜人生。
除左出謀獻策，本身亦武藝不凡，各幫海盜都尊稱佢為「龍嫂」。雖然已經有老公鄭一，不過鄭一嫂都系同美少年張保仔互生情愫。其後鄭一遇上颱風葬身大海， 黑、白、黃、藍等各旗海盜都想乘虛而入，不過喺張保仔慨輔助下，鄭一嫂能有效統領群雄，而張保仔亦都可以光明正大咁勾義嫂(定俾義嫂勾？)。
藉著同鄭一嫂慨關係，張保仔慨地位亦不斷提高，二人合力將紅旗幫慨勢力推至最高峰，多次擊退清海軍以及英國戰艦，威震海外。
邵美琪比洪永城年長，所以劇集慨選角都尚算切合，不過兩人喺劇中就規規矩矩，張保仔都只系會尊稱佢為「嬌姐」。而鄭一同石嬌亦都相當恩愛，睇嚟就唔會有張保仔介入啦！
海盜都有俠義的
以張保仔為首慨紅旗幫海盜集團喺全盛時期有海盜近四萬人，大戰船近八百，小船逾千，系當時南中國海最強大慨武裝勢力。佢哋主要系掠劫沿海慨清朝運鹽船、又 或者外國來慨貨船，唔會對一般百姓落手。因為張保仔出身貧苦，所以佢特別愛護老百姓。就算系向鄉民購買糧食，佢都會特意加倍俾錢，深受百姓愛戴。
佢又曾經同部下「立法三章」，內容大約系唔可以私自上岸，屢犯者處死；所得財物八成要歸公家所有，私吞者處死。最後，姦淫婦女者亦都系處死。張保仔海盜集團內紀律嚴明，雖然講到底佢哋都系打劫，不過都堅持只會以官府同外國人為目標，都算系有俠義精神慨海盜。
接受清廷招安
大家都知道張保仔慨紅旗幫最後接受左清廷招安，原來鄭一嫂系促成事件慨關鍵人物！
經歷赤瀝角海戰後，紅旗幫元氣大傷，權衡利弊後本來已有意投誠。不過雙方第一次談判破裂，處於劍拔弩張之勢。結果藝高人膽大的鄭一嫂打破僵局，佢毅然率領 一個包括佢在內只有18名婦女同小孩慨「談判團」，直闖廣州慨兩廣總督衙門同百齡談判。要知道當時大清律例，被捕慨盜賊首領可是要凌遲處死！
大家亦唔好以為鄭一嫂會系苦苦哀求，佢系警告百齡如果唔答允，紅旗幫將會同清政府抗戰到底，大不了一拍兩散！最後百齡接受所有鄭一嫂提出的條件，張 保仔獲封三品官，而且可以保留一支約有三十艘船慨私人船隊，多年來搶劫回來慨財產都唔再追究；而鄭一嫂則被冊封為「誥命夫人」，真系威到盡！
呢場談判仲有一段小插曲，話說接受招安慨鄭一嫂同張保仔系必須下跪以表敬意，二人當然不甘。於是百齡擔任佢的慨證婚人 ，咁就名正言順向證婚人下跪，亦都名正言順成為夫妻。
鄭一嫂喺歷史上赫赫有名，除左華人電影會提及，外國電影都一樣有！
喺荷李活賣座電影《加勒比海盜︰魔盜王終極之戰》入面，九大海盜之中有一位貌似中國人慨女性，叫做「Mistress Ching」 ，據說就系以鄭一嫂為原型創作出嚟慨人物。而呢個角色就系參考自阿根廷作家Jorge Luis Borges一本短篇小說《The Widow Ching-Pirate》，入面嗰位姓秦慨寡婦其實就系鄭一嫂，至於點解系姓秦唔系姓鄭相信只系外國人翻譯上慨問題。
咁比起上來Maggie演慨鄭一嫂靚好多喎！
轉載請註明來源：今天頭條