從港姐冠軍走到無線一線花旦位置，徐子珊可謂花了不少淚水及毅力。10年轉眼過去，面對同期小生花旦相繼離開，被視為下一個出走娘家的她卻沒有規劃往後的路，並認為換新環境需要勇氣及資源，自問沒膽外闖，一切隨心及憑感覺決定前路。
徐子珊當初盲舂舂報名參加選美，豈料摘下后冠成為四料港姐，當選後一星期已獲無線安排擔任奧運直播節目主持。由於缺乏時間搜集資料，一切由零開始的她非常甩轆，試過上鏡時腦袋一片空白，緊張得說不出話來，幸而有經驗老到的陳百祥傍實才不至於出醜人前，該次寶貴經驗為她注下強心針：「之前以為記到對白好叻，原來好多嘢要儲，之後有做過台慶主持、又做過《東張西望》主持，當選後曾經想向呢方面發展，因為覺得Do姐（鄭裕玲）好型同好有魅力！」
為了勝任主持工作，她專誠修讀記憶課程，學習以特別方法運用記憶，其後卻被公司安排入劇組，自此展開演員生涯。由於已掌握背稿技巧，她的演藝之路起步時總算少了顧慮，加上首套參演劇集《女人唔易做》有鄧萃雯及謝天華等資深演員坐鎮，令她獲益良多：「當時好新，佢哋一路幫我，好在角色要求唔算多，好陽光、好爽！角色內心戲唔多，一有前輩就會帶住，開頭拍唔識因應感情位，佢哋會幫我。（NG多？）實有。（畀人鬧？）冇試過畀人當面話，之後睇番覺得有改進空間，所以怕睇自己啲嘢。」
想哭但是哭不出來
隨著內地市場愈見蓬勃，不少無線小生花旦近年約滿後都相繼離開，一線位置更是當中的「重災區」，繼親生仔林峯去年離開後，外間估計胡杏兒及徐子珊亦會約滿離開。子珊現時與無線仍有合約在身，未有多想往後的路該如何走，她說：「本身系冇乜計劃慨人，只知道會繼續演戲。（留喺無線都可以發展？）冇所謂，從來唔想擺自己一定系點，隨心同憑直覺囉！公司咁多年都好錫我，基本上有咩活動都會帶我出去。（想出去闖嚇？）我冇乜膽喎！（無線樹大好遮蔭？）當你成日面對好熟慨人，會覺得好舒服，要搵間『新學校』需要勇氣同資源，我依家真系未諗點行，太複雜。凈系定咗未來一半時間搵錢，一半時間做社會公益，當然有個合適夥伴Fit到大家就最好啦！」
要做一個成功的演員殊不簡單，雖然演藝路比不少人來得平坦，更不時遇上伯樂，子珊卻透露10年間不時遭受挫折，例如觀眾現時喜歡她演喊戲，但當初挑戰喊戲時卻充滿難度：「本身屋企人Train到我比較Tough，冇咁易將情緒擺出嚟，不過演戲系要投射同放大情緒，所以都用咗啲時間練。聽過人講等演員喊，我都試過一套劇一日喊10場，作為新人應該點呢？不過好得意，一開咗掣又好似決堤咁！（以前唔識控制情緒？）開頭有人幫，旁人特登鬧你，我又試過用白花油同薄荷膏，差在未插眼，聽過有更加兇狠慨會用煙燻！後來入行3、4年後，有段時間密集式咁拍電影同劇集，吸取咗好多經驗，當中慨失敗同挫折令人好快成長，可以儲情緒。」
遇上不能愛上的人
談到演感情戲時要先愛上拍檔才可更投入，子珊坦言從演多年來總會遇上「不能愛上」的人，為了說服觀眾便要找投射點：「都難㗎，但要專業，人夾人嘛！化學作用撞唔啱就撞唔啱，前輩叫我搵一樣嘢嚟鍾意，如果望住一個人當見唔到，就系Outfo喇！（咪冇感情囉？）系比較差，開頭做唔到要用呢啲方法，好彩系同靚仔拍容易投入。其實性格比較重要，平時大家會溝通，有時未必系男女感情，就算親情戲都系，要訓練自己好快咁發揮感情。」子珊過往多演專業人士角色，為免觀眾看厭，她每次都做足功課：「要睇角色重點喺邊，相似但唔會一樣，透過睇電影、劇集或書本豐富角色，或者放一啲身邊朋友慨元素入去。做過好多次專業人士，不同之處系加啲細節、口頭禪同小動作，再複雜啲就調節用眼神慨力度！」
繼《My盛Lady》後，她最近再參演喜劇《以和為貴》，飾演失婚師奶展現無知一面，對於平日多演專業人士的她可說是弱項，她說：「用搞笑方法演繹，觀眾會比較容易接受，所以會用肢體配合，例如用高踭鞋當武器打交，身邊朋友睇完都話幾搞笑，自己又Enjoy！咁多年後再同馬德鍾合作，佢首次演喜劇仲做爛仔，都好突破，初頭都睇唔慣！佢平時個樣比較嚴肅，試過整喊咗一個服裝同事，搞到人哋手忙腳亂！」
Life Mission：回饋社會
子珊自言情緒化兼多愁善感，較易投入感情戲，與拍檔的感情會慢慢培養得較自然，拍喜劇卻要花上很大氣力，要計算如何令觀眾發笑，問到演戲多年，可想有轉變？她笑說：「冇諗演戲演幾耐，有啲人無論咩環境都會堅持，但我冇。當初都冇諗過演戲，好彩咪繼續做囉！表演藝術系終身都想做慨嘢，除咗滿足開飯外，仲想運用演員平台做多啲社會工作。（想回饋社會？）唔敢講到咁偉大，但相信有啲人都會尋找LifeMission，如果有100歲命，我都仲有60幾、70年要過，希望知道自己要做咩，之後為大家帶來正面訊息。」
結婚生仔系咪咁重要？
生於小康之家的子珊與家人關係密切，從沒想過長大後會離開家人生活。當年10多歲的她曾向家人表示不會結婚生仔，想一世黐實父母，長大後眼見身邊的朋友陸續結婚生仔，她的想法亦隨之改變。踏入30歲時，她曾自問是否需要擁有屬於自己的家庭，心想父母未能陪伴終老，姐姐亦已是兩女之母，一度打開心扉做YesDaughter，並接受母親安排的相親，可惜尋尋覓覓仍未找到心中的Mr.Right。
事隔數年，現年35歲的她對婚姻又有一番新看法：「依家覺得唔可以亂嚟，唔可以為咗社會或人哋慨觀點去做嘢，唔系每樣嘢都啱自己。（做藝人就更加難？）當然，正常約會都難，同普通男性朋友見面都會出事，好Frustrated，唔想每日睇報紙都話我唔知同邊個一齊，咁我系咪只可以匿喺屋企？真系幾矛盾。」
怕揀錯有負擔
為免藝人身份影響正常社交生活，加上向來偏愛物色圈外男友，她偶爾會外出認識新朋友擴闊圈子：「依家唔會好似以前咁受人影響，阿媽叫我相睇會識SayNo，多咗個人想法。成長後比較著重自己需要咩，社會系咪適合生小朋友同結婚？隨遇而安啦！社會環境轉變太快，個人需要唔系最重要，結婚生仔又系咪重要？我寧願運用個人力量幫其他人，滿足感大啲！」她又揚言若到了40多歲仍是單身，亦不愁寂寞：「一路做有滿足感慨嘢就唔悶，反而揀錯咗仲麻煩，要照顧唔想要慨嘢，唔開心之餘又有負擔！感情系最冇把握，順其自然諗清楚先啦！」
曾經有一段時間徐子珊以Do姐作目標向主持方面發展。
徐子珊（左二）初出茅廬便擔大旗做主持，幸有阿叻從旁指導。
徐子珊自爆曾經用白花油幫助拍喊戲。
現年35歲的徐子珊直言怕揀錯所以對感情有所保留，要順其自然諗清楚再作決定。
為了勝任主持的工作，徐子珊曾修讀記憶課程。
在新人階段的徐子珊曾被感情位難倒，幸得一眾前輩相助才可以輕鬆過度。
子珊收放自如，拍喊戲亦難不倒她。
雖然最後安排入劇組發展，但之前進修的記憶課程對背劇本一樣有好多幫助。
本身性格堅強的徐子珊用了不少時間去鑽研喊戲。
子珊豁出去挑戰喜劇，與黃子華合作《My盛Lady》的演出令人刮目相看。
轉載請註明來源：今天頭條