一直盛傳有意買入大埔白石角逸瓏灣嘅藝人王祖藍，終於落實買入單位，仲要一擲過億買下頂層特色單位，同老婆李亞男作為新愛巢，夠曬豪氣！王祖藍早前豪擲億元買入大埔白石角逸瓏灣豪宅，同老婆李亞男建新愛巢，呢個頂層連私人空中泳池複式單位，以老婆李亞男名買，因為首次置業有優惠，呢個單位係預備過二人世界或者將來有小朋友一齊住。

王祖藍啱啱買入嘅大埔逸瓏灣II第8座17樓A室，單位實用面積2,809方呎，仲有兩個面積夾埋有3,174方呎嘅超大平台，成交價高達1.1428億元，呎價40,684元，破曬屋苑紀錄。

今日有周刊指，祖藍後生嗰陣家住馬鞍山恆安村，讀完演藝學院就去咗大台做兒童節目，開頭都係做下閒角，直至做《荃加福祿壽》及獎門人系列，祖藍先成功脫貧，租住西貢700呎村屋，後嚟娶李亞男嗰陣，就花千三萬元買大埔雅景花園獨立屋，仲接埋媽咪同細妹一齊住，認真有孝心。

據知情者講，祖藍一直好錫李亞男，覺得遇到對方係一生最幸福嘅事，再講李亞男份人一向好純，唔追求物質，平時打扮亦好樸素，就算祖藍返內地搵銀，佢都留守香港閒時陪奶奶去馬鞍山探朋友，絕對係稱職新抱，祖藍當然放心將過億豪宅送俾老婆，而祖藍決定舊居大埔雅景花園獨立屋再裝修好就畀王母同細妹住，佢同亞男就搬去同區嘅逸瓏灣住，方便探家人。

周刊又指，祖藍豪擲成1億2千萬再買樓，當俾5成首期，即係仲有6千萬要供，加埋按揭利率，如果分廿年還款期，計埋所有雜費，每月至少供30幾萬，仲未計印花稅同律師費，好在近年祖藍喺內地撈得唔錯，更有傳半年就賺過5千萬元，睇嚟供層過億嘅樓，對祖藍嚟講似乎冇咩難度!

轉載請註明來源：今天頭條