一直有傳《美國隊長3》（Captain America：Civil War）部份鏡頭可能喺迪士尼D23上播放，最終傳聞成真。儘管Marvel於閉門聚會上稱，目前未有計劃將短片上載發布，而且現場唔容許拍攝，但從各大媒體The Wrap、The Hollywood Reporter、IGN等「純文字描述」中，大家亦能預先知道《美國隊長3》內容，即使冇片都一樣有真相。 小心劇透！

影片一開始，美國隊長、黑寡婦及獵鷹追捕Crossbones，Crossbones將磁力炸彈掟向隊長盾牌，而隊長快手將炸彈拋向空中避免傷及民眾。Crossbones擲下面具，露出充滿傷痕嘅面容，並向隊長表示：「佢當時重記得你，你嘅夥伴Bucky。」然後鏡頭一轉就係《蟻俠》easter egg一幕，獵鷹同美國隊長討論Bucky記憶漸漸回復。

下一幕，General Ross向隊長表示國家虧欠佢太多，但同時指出有聲音質疑佢唔係英雄，而只係執行私刑嘅治安維持者。然後，美國隊長跟Tony Stark激辯，隊長之前曾經歷S.H.I.E.L.D.背叛，傾向獨立於政府以外行事，而Stark則認為如果英雄行事唔受限制，同罪犯冇分別。影片跳入多段對答鏡頭，包括黑寡婦向鷹眼問：「我哋重係咪朋友？」，鷹眼答：「視乎你打我有幾用力。」至於影片最後一幕係鷹眼向隊長介紹蟻俠，原來蟻俠係隊長忠實擁躉嚟。

影片有Black Panther穿上平民裝束但暗地伸出利爪，蜘蛛俠似乎完全唔見人影。暫時估計雙方陣容應該係隊長、Bucky、Scarlet Witch、蟻俠及獵鷹，對抗Iron Man、War Machine、蜘蛛俠同幻視。黑寡婦及鷹眼會對陣，但未能確認邊個係企邊面（間諜嘅行事方式？）

轉載請註明來源：今天頭條