《Captain America: Civil War》大把超級英雄排住隊出場，而今次竟然有幸影到黑豹（Black Panther）、寒冬戰士同美國隊長喺拍攝現場進行高難度動作，Marvel保密工夫一向做得唔錯，平時唔係咁易有呢啲場面流出，不過由於今次拍攝場面分別係德國柏林ICC及奧地利維也納聯合國總部頂樓，一抬高頭就睇到，確實避無可避。

其實三位超級英雄都係由替身頂上，美國隊長需要喺樓頂上奔跑，而黑豹同寒冬戰士更加要吊哂威吔爬上爬落追逐一輪，其中一方似乎係會被打到飛落街，場面緊張刺激。《Captain America: Civil War》定於2016年5月6日上映。

轉載請註明來源：今天頭條