陀B閉關安胎 熊黛林曬7個月孕肚
2018-2-7
陀B七個月嘅準媽媽熊黛林(Lynn)日前同經理人Kim合照，曬出籮咁大嘅巨肚，Kim仲摸住熊黛林個巨肚留言：「漂亮準媽媽」對比之前大肚近五個月時嘅瑜伽照，Lynn個肚脹真係大咗唔少，上圍亦極速升cup
熊黛林 幸福準媽媽
臨近農曆新年，熊黛林(Lynn)喺相中著得紅噹噹，相當喜慶，Lynn個肚已有七個月大，喺連身裙下相當凸出，上圍亦因谷奶關係，明顯比以往升cup不少，但Lynn手腳依然纖幼，面容亦未有特別發福，真係肥肚不肥身，令不少孕媽羨慕！相信係因為Lynn好勤力，大住肚都keep住做瑜伽！
熊黛林同經理Kim合照，曬出極速升級嘅上圍同巨肚。
去年12月，個肚仍未暴脹，Lynn著住半透視運動裝做瑜伽，扭身冇難度。
廣告
獲奶奶錫到燶
熊黛林15年嫁家族擁百億身家的郭可頌，肩負幫郭家開枝散葉重任，兩公婆努力一年，上年11月終於宣布有喜！由於37歲高齡陀B，奶奶更緊張到日日煲湯去兒子屋企睇實新抱。不過熊黛林不時都搵老公陪伴外出鬆一鬆，早前就加埋腹中B仔享受三人世界迎新年！據知去年中，熊黛林同老公曾到荃灣龍母廟跪叩求子，現成功陀住五個月慈姑椗，故早前郭可頌聯同親友帶埋燒肉果籃等祭品，到龍母廟叩頭還神，為未出世的兒子祈福。
熊黛林近年已接手打理屋企家族生意的郭可頌，上有兩個胞姊，及一個妹妹，當中家姐郭可盈早已出曬名，由於係家中唯一男丁，熊黛林成功陀住金叵羅，幫郭家開枝散葉，奶奶幾乎每天都煲湯水照顧新抱！
據知熊黛林未嫁時已經融入郭家，成日出席男友家庭聚會，同未來奶奶姑奶關係好好。結婚之後奶奶更加錫佢，知道新抱有咗，就幾乎日日煲湯水過去阿仔屋企，又吩咐工人要煮啲清淡菜式畀新抱食！
廣告
熊黛林 郭可頌撐檯腳
12月30日傍晚，閉關安胎多時的熊黛林，先陪老公返柴灣公司，逗留約20分鐘，之後二人再坐車去香港遊艇會，原來當晚郭可頌已經book定檯，同老婆撐檯腳迎接新年，與腹中BB過三人世界！
郭可頌出名是「愛妻號」，對老婆照顧周到的他，當日還幫愛妻阿Lynn開埋車門，十分細心！
近日寓所鄰居裝修，搞到阿Lynn冇覺好瞓，當日素顏出街的她，睇落就有啲憔悴。
廣告
熊黛林 摸龍床寫願望
熊黛林同老公婚後都心急生B，據知去年中兩人專誠到荃灣龍母廟求子，在廟裏跪地又叩頭，之後亦跟足規矩去摸龍床寫願望。點知真係唔夠一個月，熊黛林就成功陀仔，所以好緊張計劃返廟還神！不過，為免老婆挺住五個月肚操勞，日前郭可頌就聯同親友帶齊燒肉及果籃，到龍母廟誠心叩頭還神，答謝龍母娘娘賜福！
郭可頌求子成功，日前專登帶備燒肉果籃，誠心去龍母廟還神。
郭可頌同廟祝買香燭等祭品，然後就坐低等候，當日更誠心跪地叩頭還神，答謝龍母娘娘。
等候還神期間，郭可頌不停睇手機，同老婆保持聯絡！
還神個多小時，郭可頌離開時狂飲水解渴，之後與兩位親友一齊攞車離開。
廣告
求子必拜
位於荃灣上角山的龍母廟建寺60年，雖然位處偏僻，不過長年香火鼎盛，好多明星名人如張智霖、楊怡、黎諾懿都是信眾。人們多拜龍母娘娘求子，更必定摸龍床求好運求生子，而龍母亦對小孩特別眷顧，所以亦有不少家長帶埋子女上山拜龍母，求子女健康成長。
轉載請註明來源：今天頭條