眾所周知，無線藝員薪水偏低，即使你是一線小生花旦，都和內地差十萬九千倍，如果是綠葉演員更加不用說，隨時得萬多元一個月，好像網民很喜愛的綠葉王戴耀明，無論「排長」或「動L哥」等角色，雖然戲份少，但就十分搶鏡，但入行25年，雖然穩守配角位，但要更上一層樓就不容易，在無線沒有機會，不過在內地反而上位。

戴耀明在無線多演配角，但在內地反而當了愛奇藝電影《爆裂老婆三歲夫》男主角。

戴耀明早前在內地拍了一套愛奇藝網絡電影《爆裂老婆三歲夫》，更飾演男主角，他接受訪問時，說：

真系估唔到有做男主角嘅機會，自己知自己事，喺無線多數做配角啦，可能有時得幾場戲，但明嘅，咁喺無線未搵到飽飯食，就要出去諗下計啦，但冇無線亦冇人識我戴耀明。

戴耀明在內地劇也是演配角，但戲份重很多，更有個人海報宣傳。

戴耀明雖然有拍內地劇，但仍是無線藝員，現忙拍《果欄中的江湖大嫂》，他說：

我做一個角色都幾攪笑，講陳煒唔知點解跌咗條底褲，我就偷咗佢，仲攞嚟聞，哈哈，

戴耀明演過不少角色，大家又認識幾個？

《EU超時任務》戴耀明神級演技，表演生理反應，令網民大讚神乎其技。

在無線依然要做諧星，但在內地他的位置高很多，尤其愛奇藝，除了電影當男主角，剛完成的網劇《大清神捕》《明朝刺客》都當配角，就連宣傳海報都排在中間位置，他說：

內地資金真系好多，亦好鍚啲演員，點會估到我都有保姆車接送，私人助手俾我？拍一組12個鐘有3至4萬人仔，有時拍幾個鍾都照收，根本上系我無線兩個月人工，但唔系講客氣說話，冇TVB我冇呢啲搵銀錢會，因為佢哋演員、劇組都叫我戴老師，原來佢哋都系睇TVB劇大，因為咁先識我，所以我好多謝TVB。

在網劇《明朝刺客》飾演李公公，戲份多，海報在中間。

但人們不禁要問，既然在國內吃得開，為何還要留在無線呢？除了因為戴耀明視無線為娘家外，最重要是不捨得79歲媽媽一個人在香港，他說：

自己都諗唔到喺大陸有機會，亦有國內經理人話不如簽俾佢，留喺大陸長期發展啦，但我最後都冇，因為都想多啲時間陪阿媽，試過有次喺大陸拍緊嘢，我女朋友話我聽「你阿媽疴血喎！」我即刻打俾佢，佢仲話冇嘢喎，好小事，我話阿媽疴血都真系唔小事喎，佢好怕阻到我返工，仲叫我唔好落返香港，我梗系落返嚟啦，雖然嗰次系腸胃敏感啫，但嗰次我就喺到諗，如果真系簽上面，真系成年喺大陸，得返新年一兩個星期先落返嚟喎，咁阿媽點呢？諗過都系繼續喺無線，有啲十幾日上大陸嘅工作就接囉。

戴耀明現忙拍無線劇《果欄中的江湖大嫂》，劇中和陳煒及黃浩然等，有不少對手戲。

戴耀明這麼緊張媽媽，因為當日是她叫戴耀明報讀亞視藝員訓練班，他說：

當日喺阿媽睇到亞視藝員訓練班廣告，叫我入讀住先啦，無線都未收人，佢由最初到而家都好支持我，佢同我講過㗎「雖然唔系大紅大紫，又唔系賺好多錢，但最緊要你開心，而家有人搵你返大陸仲好啦，當有人俾錢你去玩囉，」哈哈，老人家好得意㗎，仲記得亞視訓練班出嚟，即刻拍戚其義監製嘅《李小龍傳》，吳大維做男主角，我同張家輝做佢朋友，仲飛去加拿大拍，我人生第一次搭飛機。

20歲戴耀明在亞視入行，讀完亞視訓練班，即拍《李小龍傳》男主角吳大維。

戴耀明在無線多演諧角，但戴媽媽一直很支持他，每次看無線劇集，都期待看到兒子的演出，他說：

我阿媽喺電視見到我會即刻打嚟㗎，喂，又見到你喎，幾好呀，幾攪笑，但當見我做啲壞人呢，佢就話嗰啲唔好呀，教壞人呀，佢太入戲喇，哈哈，有時佢話希望自己長命百歲啦，等你攞獎，返到屋企都有人恭喜下你嘛，唉，佢成日講埋呢啲笑嘅，又好擔心我，未成家立室....

戴耀明希望拍劇之餘多點時間陪媽媽

戴耀明當然明白無線遊戲規則，自知達成媽媽這個心愿渺茫，但亦知媽媽出於一片關心，所以他對媽媽說了一個多年的「大話」，他說：

我同佢講攞咗獎嗰啲好忙㗎，如果我攞咗，邊有時間陪妳呀？唔攞獎仲好呀，搵錢實際啲，我每年都同佢講，出年俾個孫你代替個獎啦，但我呃咗佢好多年..都整唔到個孫俾佢。

拍攝《鐵馬尋橋》期間，戴耀明爸爸身患重病，有幾場戲他更忍不住落淚。

戴耀明最為人熟悉的角色一定是《鐵馬尋橋》的排長，到現在網友說起這名字都自然想起他，但其實拍攝《鐵》劇時，是他的人生最低潮，他說：

嗰陣應該系拍《鐡馬尋橋》，爸爸亦系身體最差嘅時間，醫生都話佢...唔會捱得好耐喇，有一場戲講我被師傅King sir鬧我冇鬼用，生嚿叉燒好過生你，嗰場明明唔駛喊㗎，但我唔知點解忍唔住喊出嚟，但導演又拍咗喎，咁出咗街之後都有啲反應啦，咁就系大家成日講嘅排長喇，老豆都支持我嘅，但就冇阿媽咁出面啦，始終老豆傳統啲，感情就收得埋少少，但做仔系知嘅。爸爸走咗之後，我情緒好低落，覺得人生好多嘢都好快走呀，嗰陣有少少抑鬱，我有睇心理醫生，好彩唔駛食藥。亦唔好話有咩低潮，因為我一直都冇高潮過，哈哈，而家最緊張媽媽啦，佢系我永遠第一個分享嘅人。

轉載請註明來源：今天頭條