阿Bob與黃宗澤、周柏豪、方力申等一班人去到張繼聰夫婦位於大埔比華利山的獨立屋拜年，眾人圍在戶外打邊爐，烚下烚下醫肚，氣氛熱鬧！

一向酒量有限卻不醉無歸的阿Bob，經過一輪溝酒互劈加自隊，酒精上腦，隨即變成另一個人，口齒不清，發酒癲不受控猛講粗口，而且聲浪愈來愈大。

事前各人一早協議於戶外抽菸，但喝醉的阿Bob話之你，走到邊食煙食到邊，更不顧孕婦及小朋友在場，照食可也！

而酒後有鋪強吻癮的他，又逢人攬又錫，有不願被強吻的人起勢擋，亦因人多而場面混亂，獨酒醉Bob勸極唔走，就連屋主下逐客令亦賴死唔走，更反而向勸他的朋友箍頸及聲大夾惡鬧人，世上已無力量阻止Bob。

而陀B Kay亦由無奈到動真火，終於幾名友人夾手夾腳夾Bob離開，才終止這場拜年浩劫，本來高高興興團拜，意外因阿Bob而變鬧交收場，事後阿Bob仍唔知衰，po醉前大合照上網並留言：「飲咗好多酒、之後喪X噏、又嚇走咗幾條友⋯⋯」似乎徹底爛醉的他仍未知事態嚴重，隨時朋友變被unfriend！

酒後亂性有前科

其實過往Bob亦曾試過飲大兩杯，輕則有笑料，差點打架也見不少。15年10月，錢國偉辦婚禮，醉爆的Bob衝上台贈興，辣㷫同樣有醉意的陳小春爆粗掟咪兼追打他，而婚宴當晚由好友梁烈唯陪他離開，阿Bob竟主動同唯唯激咀。

另外《一路向西》男主角張建聲在《沒女神探》慶功宴玩社交App「17」直播，同場已飲醉的阿Bob煲住煙不停入鏡，對住鏡頭舉中指又大爆 「X你XX」。

Bob本來形象正面，熱愛家庭，早前更帶埋老婆及三位公主上節目。不過好好先生的形象背面就有多次醉酒鬧事前科，如果仲唔改善一下，真係隨時被朋友unfriend！

轉載請註明來源：今天頭條