童星出身的林穎彤（Bella）和李日昇（Jonathan）在劇集《城寨英雄》飾演身世慘情的「鑫鑫」及「小智」，演技出眾受觀眾讚賞，兩人一同接受本網專訪細談昔日往事，包括鮮為人知的辛酸經歷。

林穎彤和李日昇接受本網專訪，細談昔日做童星的辛酸經歷。（本網記者攝）

兩人自細在電視螢幕亮相全港觀眾面前，Bella曾在前亞視《萬家燈火》分飾三角，而Jonathan令人印象較深刻的是《溏心風暴之家好月圓》飾演「管家仔」林峯的童年。他們都是年青人，但拍過的劇集可能不比其他前輩少，鎂光燈背後他們各有不少回憶。

李日昇：無綫有規矩11點前一定放曬啲小朋友，瞓覺時間唔會少咗，但可能有時喺電視台做功課溫書，都有啲壓力。如果我成績唔好，媽咪就會俾人話「俾個仔去拍戲，搞到啲成績唔好」，所以都要keep住啲成績好，嗰時我連續六年都係全級第一。

林穎彤：嘩！點解你咁犀利嘅？

李日昇：因為我媽咪幫我補習，我媽咪係補習老師。

李日昇坦言看到《城寨英雄》劇本後，覺得一定會好睇。（本網記者攝）

林穎彤曾在亞視的《萬家燈火》做童星。（林穎彤微博圖片）

拍戲工作時間長，加上每日又要返學，容易睡眠不足，但兩人年紀小小未有放棄，繼續堅持演藝夢，專注學業的同時，家人亦無要求「減產」。

李日昇：我成績OK，佢哋會俾我拍落去。呢個係我興趣，我唔想連累到我媽咪俾人話，因為我自己想做，成日聽到人話「一定你媽咪逼你去」，但其實唔係，我自己都好鍾意拍劇，所以我成績一定唔可以差，一定要好，如果唔係媽咪俾人鬧。

林穎彤：我覺得我細過時媽咪會辛苦啲，我記得都好攰，拍嘢長時間又要返學。我記得以前收工搭巴士返屋企，媽咪孭我返屋企，因為我眼皮控制唔到「Dump」落嚟，所以媽咪帶住我仲攰。一放學趕去拍嘢，同埋有啲時間要取捨，因為有一套劇我要染小小髮同電鬈，我臨放暑假嗰幾日就去整，犯住校規去返學，老師有問我點解咁做，提醒我唔好咁做。學校都好體諒我，知我做嘢，放我一馬。

林穎彤做童星時期甚少與同學相處，對她是一種遺憾。（本網記者攝）

Bella和Jonathan細細個已「投身」社會工作，早已習慣冷言冷語，當中更很多都是不足為外人道。

李日昇：我細過比較孱弱，個樣好似好好恰，有時行出街都會有啲人用啲好難聽嘅說話，譬如「呢個咪拍戲嗰個咖哩啡？」或者有更難聽的粗口，但我唔知用粗口鬧我。

林穎彤：嗰時拍嘢之外，都有幫雜誌影嚇相，上堂時同學將我啲雜誌係咁傳，我知佢哋講緊我，會有呢啲尷尬事發生。

林穎彤與李日昇於《城寨英雄》飾演身世慘情的「鑫鑫」及「小智」，演技備受觀眾讚賞。（本網記者攝）

文章來源: https://www.twgreatdaily.com/cat125/node1226548

轉載請註明來源：今天頭條