無綫劇《城寨英雄》播出前，大家都只見到一眾大隻男如陳展鵬、袁偉豪及伍允龍等又曬肌又打到飛起，估唔到出街後竟然會有咁多配角突圍而出！好似李嘉、林穎彤及魏惠文等知名度較低的演員，都因為在劇中演得出色而人氣急升！其實另一配角、劇中飾演毒梟福壽金的型佬林偉一樣有唔少觀眾支持，今集佢除了一貫的大癲大喪，仲會神打上身變爆肌男，勁有睇頭！而且唔講你唔知，林偉那些年仲同大美人李嘉欣做過同學！

劇情講到花曼(王君馨飾) 終於搵到福壽金(林偉飾) 收藏毒品的貨倉，然後將所有毒品偷走，佢同馮春美(吳家樂飾) 仲打算將偷貨一事嫁禍予柯萬長(張國強飾) ，等佢哋兩幫人內訌。

花曼將毒品收藏在泰婆(元秋飾) 的店中，福壽金發現毒品後同泰婆大打出手！點知福壽金竟然神打上身，口噏噏一餐之後威力大增，泰婆一時不敵！

幸好牙佬(袁偉豪飾)及拳佬(陳展鵬飾) 及時趕到，替泰婆解圍，但原來福壽金仲有絕技，食完啲唔知咩藥後忽然爆肌，青筋暴現，十足十變形俠醫！

爆完肌之後福壽金變到神神化化，威力無比之餘仲好似完全唔怕痛，打極都打唔低！其後龍城虎(伍允龍飾) 出現幫忙，牙佬拳佬先終於搞掂佢！

受傷的福壽金誤以為柯萬長偷走毒品，於是捉走其女兒柯德莉(劉佩玥)，要脅對方交還貨物。點知情節忽然變膠，福壽金食食嚇嘢無啦啦哽親，吞完啖飯都冇用！

柯德莉話曬喺外國讀書，學過急救，於是眾人將佢鬆綁，然後佢就幫福壽金做哽塞處理，最後終於無事！

生於1961年的林偉今年54歲，加入娛樂圈逾30年，少輕時身材高大健碩，除了模特兒外，仲拍過唔少三級片。佢近年回巢無綫後多演奸角，不時演黑社會大佬或者匪徒一類的角色。原來林偉同《城寨》另一演員魏惠文(飾演鑫鑫父親) 一樣，畢業於演藝學院戲劇系，在模特兒公司當學員時更加係大美人李嘉欣的同期同學！

回巢後參演唔少劇集，好似《EU超時任務》的賀展祥、《神槍狙擊》的江志毅及《使徒行者》的猜Fing等，雖然戲份唔算多，不過演出入型入格，都成功令觀眾留下印象。雖然林偉已經年過半百，但樣貌身材都keep得好好，絕對係大台買少見少的中年型佬！

「福壽金」在劇中大奸大惡，不過林偉私下同一班演員關係好融洽！其中一張相仲見到「夏滿」李嘉同「鑫鑫」林穎彤傾得好開心！

林偉在劇中就神打好厲害，原來現實中都唔係泛泛之輩！因為林偉練泰拳多年，除了係一名演員，仲係一位泰拳助教！真係打得又睇得！

據知林偉未入行前，曾經係一名喺尖沙嘴寫字樓返工的白領人士，一次佢著住西裝搭地鐵時被星探發掘，自此成為模特兒。有時西裝唔係話靚仔著就一定型，更要身形及佬味搭夠，小編個人覺得林偉著西裝確係一絕！

轉載請註明來源：今天頭條