2006年港姐去曬邊？當晚候選佳麗好多都有出到嚟，個個都打扮得好靚喎！
人生又有幾多個十年？2006年港姐冠軍陳茵媺就同亞軍周家蔚約埋當年一齊參選港姐嘅黃瑩、鄭嘉雯同周詠懿等等喺尋日gathering，點解係尋日？咪因為當年決賽係喺8月12日舉行囉，真係好有心思呀！
唔經唔覺已經十年，睇嚟佢哋真係好謹記「友誼第一，比賽第二」嘅宗旨，所以十年過後依然咁好朋友！周家蔚就喺社交網上載佢哋十周年聚會相，除咗季軍長腳蟹呂慧儀冇嚟之外，幾乎全部到齊，而且個個都凍齡有法，仲keep得好好，不失當年風華絕貌！
十年嘅友誼得來不易，所以個個都好感觸，周家蔚留言：「years ago today 8-12 it was 2006MHK A super memorable night for all of us. Many things have changed but obviously not our friendship. I haven't laughed as much(in tears) for a very long time .（好多年前2006年嘅今日，對我哋嚟講係一個好難忘嘅日子。好多嘢都變咗但我哋友誼冇變到，好耐未試過笑到流眼淚喇！）」
曾瑞珊亦有留言：「十年人生 真的得來不易，2006年膽粗粗不知好歹地參加了一個以美為主的比賽，過程不用多提，結果也不用多提，但卻在比賽中換來了今日身邊的戰友們，兩協（肋）插刀的好朋友們，感恩我們的相遇、相識、相知，祝我們友誼永固。」而並非選美出身嘅姚子羚當晚都有出席，感受嚇一班港姐嘅開心時刻！
轉載請註明來源：今天頭條