「世紀賤男」周永恆．（Roy）於父親節前夕突然蒲頭，揚言：「就算我殺人放火，我都係佢哋（兩女）爸爸，我無對佢哋唔住，爸爸好愛你哋，我唔想父親節做個無女兒嘅爸爸。」雖然周永恆交足戲，但趙頌茹（阿Yu）保持沉默堅拒做對手戲。第二年過父兼母職的父親節，阿Yu笑住答：「去年未捱過谷底，父親節會耿耿於懷，今年我無曬壓力，因為搵到路向，身心大解放，所以當日三母女都玩得好開心。」阿Yu率先報喜，和經理人Kitty合資，代購韓國潮服的網店將於下月開始營運，獨力撫養兩女，自強小師奶努力為囡囡打拚，請加油。
沒有父親周永恆，趙頌茹攬住兩女(5歲信希及3歲愛希)依然過得快活自在，因為已經無包袱，仲無避忌哋喺facebook貼文，「祝每一個爸爸父親節快樂！」同時又大曬囡囡的父親節畫作並留言：「我也想告訴我爸爸和媽媽，我活得很快樂！」徹底地表達了現時的心聲。
大女愛Cooking
話只想見到囡囡的周永恆在父親節玩「潛水」，趙頌茹可以好平靜咁度過：「因為大女信希最近愛上Cooking，當日我陪佢上Cooking Class，跟老師學整啫喱仔同玫瑰花蘋果酥，同班學員將製成品送畀爸爸做父親節禮物，信希就轉送咗畀公公，當晚我哋返公公婆婆屋企食飯慶祝，外家好溫暖，三母女都好開心。其實我同大女一直有溝通，佢完全知道家庭狀況，只不過唔會追問，但就表示過，而家生活好開心，至於細女年紀太細，應該唔知發生咩事。」父母離異，對囡囡來說可有缺失？阿Yu坦承：「表面上係可以彌補嘅，佢哋係Happy Girls，最唔開心係無糖食嘅啫！但講真，人生係無完美嘅，無一個人可以擁有一切。」
大搞網購生意
經一事長一智，趙頌茹上了寶貴一課，往後日子學會對自己更加好，更表明要做獨立女性，靠自己。稍後她會和經理人合資做網購生意：「因為唔係開實體店，投資時間同金錢都唔算好大，我哋會親自去韓國買貨，做藝人比較被動，都係時候為自己打算嚇。做時裝係我老本行，當年(2007年)因為性格唔適應娛樂圈曾經轉行做時裝記者，亦幫過Amusic藝人做形象統籌，幫衞蘭、文詠珊及李治廷設計造型，所以呢方面難唔到我，仲可以做埋生招牌。逆市下做網店都可行嘅，有危就有機希望可以殺出一條血路啦，今次我拎曬私己錢出嚟，期望半年內回到本啦。(同鄭希怡打對台？)哈！百花齊放啫。」當然，今年8月，趙頌茹和周永恆分居兩年期滿，單方面申請離婚亦會同步進行。
文章來源: https://www.twgreatdaily.com/cat125/node1177853
轉載請註明來源：今天頭條