雖然無線一線演員經常被狠批戲屎，不過啲劇集仍然有一定數目慨觀眾支持。原因好簡單，因為佢哋仲有一班好戲慨綠葉撐住。喺上半年，有唔少綠葉都成功彈起左，亦都終於令到大家記返佢哋個名。

康華《刀下留人》

康華1994年參選港姐入行，喺無線多年都系做一啲綠葉角色。06年終於憑住《男人之苦》入圍萬千星輝頒獎典禮最佳女配角，可惜贏唔到，之後就返左內地發展。去到2012年回歸無線仍然都系做配角，不過喺告別作《刀下留人》佢飾演慨萬貴妃就贏盡網民歡心。網民都贊佢雖然已經超齡，不過保養得宜，女人味又濃，被獲封「最正奸妃」。

簡慕華《刀下留人》

簡慕華其實一直都屬於好戲派，不過有網民就話因為佢唔夠靚所以只能做二、三線角色。而佢喺《刀下留人》入面飾演慨赤映霞身世可憐，好似象徵著社會一小撮無親無愛無自信慨悲劇人物，可能就因為咁而得到網民慨共鳴，再次令人留下深刻印象。

李成昌《公公出宮》

相信一班睇慣TVB慨觀眾對李成昌都唔會陌生，佢經常都系飾演一啲蝦蝦霸霸慨衰人。可能因為「熟能生巧」，佢喺《公公出宮》入面飾演壞人徐大富就被網民激贊。話佢壞得嚟又好可愛，仲有網民呼籲TVB要好好保留佢呢啲「寶貴資源」。

戴耀明《EU超時任務》

《EU超時任務》除左捧紅左譚凱琪之外，仲順便帶挈左另一綠葉戴耀明。話說劇中講到演記者慨譚凱琪為左幫老友查案，就著住tube dress扮索女放蛇埋戴耀明身。有網民就發現本身戴耀明條褲都仲系平慨，不過譚凱琪一坐埋去佢就即刻有反應，「動L」左。網民贊佢演技收放自如，值得鼓勵！

威利《僵》

威利曾經同林子祥同張武孝組成「玉石樂隊」踏入樂壇，鍾意做戲慨佢其後加入電視台拍攝劇集，經常都系做一啲滑稽搞笑慨角色。不過1996年開始，佢發現自己喺娛樂圈無咩發圍機會，所以就決定喺內地從事製衣事業，不過2015年佢又開始幫無線接拍劇集。雖然喺《僵》入面又系飾演騎呢搞笑角色臥龍小子崔龍珠，戲中佢醉心研究殭屍同不死人，一直以殺殭屍為目標，去到臨結局慨時候佢真系殺到殭屍，可惜亦被殭屍所傷而死。好多網民都表示覺得佢好搞鬼，有網民更表示要沉痛哀悼滅僵勇士崔龍珠。

苑瓊丹《火線下的江湖大佬》

已經好耐冇見慨苑瓊丹一向都好戲架啦，佢今次喺《火線下的江湖大佬》入面做傻冧家姐蘇佑妙「Miu姐」，又搞笑又搞鬼，保持一貫水淮，每次一出場都一定搶曬鏡。劇中仲成日有意無意拋金句，有時仲話系莎士比亞講過，唔少網民都覺得好盞鬼

趙樂賢《純熟意外》

佢喺《純熟意外》入面飾演有幻聽、自殺傾向慨角色，喺戲中佢咬牙切齒咁講出一連串感受之後，佢就用槍指住自己下巴開槍自殺。佢犀利到連死嗰刻慨眼神都令人感受到佢慨猙獰同無助，完全搶曬同場主角吳啟華同蔡思貝慨風頭。網民睇完都紛紛問佢究竟叫咩名，仲大讚佢表情到位，完全將自殺嗰份惶恐、絕望、激動表現出嚟，超級好戲等等。

文章來源: https://www.twgreatdaily.com/cat125/node1122983

轉載請註明來源：今天頭條