大臺力谷嘅劇集《殭》，雖然有「女神Kay」坐陣，又有大批青春靚女，好似陳凱琳、陳瀅、陳嘉寶、劉佩玥等等，不過收視一直都麻麻，第一集平均最高收視都只係得24點，之後嘅收視明顯被ViuTV嘅《太陽的後裔》追住嚟打，遇上公眾假期更曾試過跌穿20點。

嚟到噚晚《殭》大結局第33集，收視幾多呢?比起上上個星期日(8號)，升咗4點o架!有平均25.8點收視(約167萬觀眾)，但前一日第32集(14號)，比再上星期六(7號)係升咗3.2點收視，但都只係平均有20.2點收視(約131萬觀眾)，喺9點半第一節時段，更只有平均18.7收視，之後先回升返。

咁睇返上星期星期一至五《殭》嘅收視5日拉勻係平均23.8點收視，比起前周冇升冇跌，再睇另一部8點半檔嘅劇集《火線下的江湖大佬》，平均24.4點，下跌0.3點。

睇返上年大臺結局最低收視劇集，係已離開大臺嘅胡杏兒主演嘅《陪著你走》，結局收22點，咁《殭》結局又俾網民插唔明，突然又出現病毒又外星人咁，o依家有25.8點，可能要劏雞還神！

文章來源: https://www.twgreatdaily.com/cat125/node1080453

轉載請註明來源：今天頭條