無綫劇《殭》劇情真係愈來愈緊張，眾多謎團漸漸解開，而眾主角的命運會是如何，都令觀眾非常期待！不過噚晚一集突然出現多個轉捩點，而且橋段膠爆，難免令人懷疑劇集結局係咪會爛尾…

劇情講述藍夢南(謝安琪飾) 終於明白自己點解同凌風(陳山聰飾)會有強烈的感應，好似《吸血新世紀》咁，夢南捉實凌風隻手就可以令對方睇到過去的畫面。呢個時候凌風終於發現，原來自己係俾夢南咬完之後變成殭屍！所以大家唔使再估佢哋係兄妹定夫妻，原來兩樣都唔係。

但小編有個疑問，《殭》頭幾集曾經提及凌風同刑活著(鄭嘉穎飾)幾百年前已經交戰，而凌風變成殭屍應該係更早之前的事，咁點解當時會有咁現代化的房間、咁現代化的衣著…… 不過見到兩人身處一個恐懼鬥室似的密室，著住類似病人服，可能係有伏筆？亦有可能夢南係為咗凌風好先咬佢？

夢南決定要親手消滅凌風，但一番激戰後不敵，呢個時候阿刑當然就及時出手相救啦！

阿刑為救夢南不慎從高處墮下，仲被粗鐵枝插穿身體，頓時血流如注！

傷心欲絕的夢南為救活著，於是決定為對方輸血！而輸血的方式就係抓破自己的手腕，將血滴落阿刑的傷口……咁都得？

題外話，其實阿刑喺劇中唔係好似狼人咁樣，傷口識得自動癒合咩？點解今次重傷之後就好唔番？真離奇！

夢南不斷輸血俾阿刑，搞到自己面青唇白，真係心痛死Kay BB一班粉絲！不過好彩阿刑最後都冇事，醒番！

阿刑醒番之後，無意中撞破毒品交易，隨即被對方上前攻擊。一向好打得的阿刑來以為三兩嚇手勢就可以解決對方，點知發現自己竟然完全唔夠打，更被對方用槍指頭，準備滅口！

好彩夢南及時出現將眾人打倒，將阿刑救走，但阿刑得知自己已經失去不死人的能力，一臉沮喪……

嚇？原來不死人被殭屍輸血後就會變番凡人？小編同觀眾的反應，咪好似何年同C君咁囉…… 其實爭咩吖，溝埋嚟做半殭屍半不死人吖笨！

轉載請註明來源：今天頭條