每個月有幾日女朋友都會變得特別難頂，一邊呻M痛仲要一邊發你脾四，奈何男人冇子宮，根本唔知M痛有幾痛，唯有問句︰「你有冇事呀？」、「要唔要飲杯熱水呀？」……但對於呢啲「講完好似冇講」嘅廢話，女朋友只會發多幾錢重脾四。唔想再畀個臭西……梳，我指臭四女朋友當狗咁鬧，作為男友，呢啲時候，有咩應急方法呢？有網民就列出一系列應對守則，就咁睇，應該係最尾嗰點會最work。  

1. 除咗問「痛唔痛」之外，可以多啲同理去氹下佢︰「乖，係咪好唔舒服呀？」、「睇你個樣一定好唔舒服，不如瞓喺度休息下？」

2. 與其叫佢飲水，不如自己快手快腳煲定啲桂圓紅棗茶、生薑糖水，又或者準備定止痛藥畀佢。

3. 自動自覺幫佢準備熱水袋或者暖包放喺肚上面。

4. 如果手頭上咩都冇，咁就畀佢一個warm hug又或者將對手搓熱，幫佢敷住個肚。

5. 如果佢仲有心情，就講下笑話氹佢開心，但注意唔好引佢大笑，因為一大笑佢就會痛死……

6. 如果女友叫你收聲唔好煩佢，咁你就默默地喺佢視線範圍內等候，隨時聽候佢差遣。

7. 女友M到時任何情況下都唔好激嬲佢，要放低姿態，盡可能遷就下佢。

8. Download記錄經期嘅APP，提醒女友月經前唔好食凍嘢。

9. 打自己嘅蛋蛋陪女朋友一齊痛。

10. 唔好要女朋友，搵過個男朋友。

文章來源: https://www.twgreatdaily.com/cat120/node1666448

轉載請註明來源：今天頭條