琴晚一路睇幕後玩家
老婆一路係咁喊
原因係劇情同我地屋企實在太相似
一樣有一個出軌既老公
一樣有一個大左肚既小三同事
一樣有一個就算有事都仍然支持住老公既老婆
唔同既係我媽冇比車車死同未有個幾歲大既女
我改呢個名（香討ID：真-幕後玩家）
個重點並唔係想話自己係玩家
而係 真
就借幕後玩家呢套劇
去講一下我既故事......
Part 1
同劇情一樣既
Emma要我同屋企講佢既存在
提出要共存既建議
唔一樣既係我選擇左自爆
如果唔係就可能好似琴晚既劇情咁樣
自爆當日係星期一
老婆咁岩射波冇返工
之前其實已經同Emma傾左無數次
嘗試令佢打消要爆湧既念頭
但當日終於傾唔掂
我先即時飛番屋企搵老婆
路上又怕佢會搵到我老婆先
所以不停咁同佢msg
一返到屋企老婆問：「你冇事丫嘛？邊度唔舒服？」
面無血色既我個樣應該比真病果陣更病
我坐喺梳化話：「老婆，我有D野想同你講」
我示意佢坐低，雙手拖住佢
我打開口但講唔到野
我知道我一定要講
但我亦知道我一講就好可能會冇左呢個老婆
老婆見我咁即時喊左出黎
企起身攬住我講：「老公你做咩呀？唔好嚇我」
（後尾知道佢以為我有絕症定比公司炒左）
我既眼淚忍唔住咁流
我深深咁吸一口氣
講出我有外遇
老婆推開左我：「你講咩話？」
佢既眼淚仍然繼續流
但表情已經變左鐵青
冇大炒大鬧
更冇對我動粗
過左一陣佢問：「係邊個？」
「係咪Emily?」
我並唔識Emily，但我知道佢想講既係Emma
因為喺我facebook留意到有異樣
女人既直覺真係得人驚
但佢之前選擇信我
可惜我辜負左佢
我：「佢叫Emma」
老婆：「幾時開始架？」
我將事情既始末講左比佢知
最後老婆好似冇左靈魂咁
木無表情咁，眼淚不停咁流，不停咁重複：「我咁信你，點解你要咁對我？」
傾既時候我幾電話轉左做飛行模式
果然...Emma係炸爆左我部機
一轉番正常mode就即刻響起
Emma：「你去左邊呀？做咩唔聽電話？」
我：「返左屋企，我同老婆講左喇」
Emma似乎估唔到我有呢一著，無言以對
老婆：「係咪佢呀？」
我點點頭
老婆：「比我聽」
我：「你等等，我老婆話想同你講」
我開左speaker比老婆講
老婆突然回左魂，好正常咁接呢個電話
繼續冇大炒大鬧
但係理直氣壯地指責對方破壞佢既家庭
「你受害？你點受害呀？而家佢強姦你呀？係你就話我知我同你去差館呀」
聽到老婆咁講完全係我意料之外
何況係毫無準備既Emma
最後老婆順利擊退左Emma...個來電
收線後佢同我講：「呢個女人唔會就咁算架，你改番你阿媽facebook d隱私啦，咪比佢搵到」
我如夢初醒咁跑去拎阿媽部iPad
手震震咁輸入左自己電話個密碼
「唔係呢個呀」
我諗諗入番個正確密碼
搵緊要點樣改隱私選項
對手仍然係震過扮道友果D臨記
佢搶過部機：「等我黎啦」
我見到佢仍然盡力守護呢個屋企
雖然我唔知係為佢自己定純粹唔想比Emma贏
令我覺得...呢段婚姻可能仲有得救
Part 2
唔記得左交代下人物背景
我喺國內返工既
係公司既中高層
我地開始時佢係喺香港公司既職員
後尾（事發幾個月前）調左上大陸
而我老婆公司係喺香港既
第二日老婆堅持要返工
但係我冇返到
果晚去接佢放工
佢話有野比我睇
去到附近既公園
原來Emma用facebook pm 左一段千字文比老婆
內容大概係話我好衰
大陸好多引誘，邪骨／交友Apps....
可能除左佢以外我仲有其他人
話我當初點對佢好，但而家一腳踢開佢....之類
最後係一張婦科醫生既卡片
話介紹比佢
（事關比過佢知我老婆有線肌瘤，所以一直未有BB）
我既總結係佢得唔到既都唔比你好咁既感覺啦
尤幸老婆都有相同諗法
佢叫我打比Emma
我用headphone聽住其中一邊
當時係食飯時間
佢喺飯堂同其他同事一齊
當然其他同事唔知我地既事
「喂，Emma丫嘛？」
「喂...喂....sorry 唔係好聽到你講咩...喂...喂...do............]
好幼稚既做法，好明顯佢又估我老婆唔到
被殺一個措手不及
再次打過去
Emma應該離開左飯堂
同有左心理準備
老婆再次同Emma講：「我既野唔使你粗心，你不如諗掂你自己先啦，你就黎見肚架喇」
最後都再叫對方唔好搞我地屋企
老婆再一次打發左Emma
Part 3
睇黎老婆成功地令到Emma死心
佢決定做手術
但佢想我陪送BB最後一程
我拒絕左
之前為左避過我老婆耳目
我地用微信溝通既
事後比老婆睇到
越睇佢既情況越差
所以我就剷鬼左佢
亦可能因為咁
Emma覺得我唔再回覆佢
有日我同大佬同老細一齊行緊去開會時
佢欄住我問可唔可以傾兩句
我唯有話得啦
佢繼續要求我陪佢去醫院
我當時好嬲佢
覺得係佢迫到我今日咁既田地
加上當時首要要保住老婆
所以我堅決地再次拒絕
「我夠鐘開會喇，老細等緊」
點知...呢句成為左我同佢最後既說話
一日後佢Whatsapp問我可唔可以送佢最後一程？
52分鐘後我答：「我唔方便」
「你連幾點都冇問」
「你都係day time架啦」
「6點入院」
「我要返屋企」
「9:30正式
朝早
係咪唔可以抽到時間 」
「係」
「錢係咪你比？」
「可以，你比番張單我」
。
。
。
「我知你唔想理，你放心，我真係冇想纏住你，過埋聽聽就完結
只係呢一刻一諗到聽日要去醫院，要訓好多個鐘手術床就好驚，驚到胃抽筋，但又唔可以食藥..]
我冇回覆
第日
08:32
「就黎要上手術室..」
佢影左換左手術衫既相
08:52
「出發喇，BB同你講拜拜」
12:02
「BB冇左喇，我仲流緊血..係一句都唔覆我，係咪你一D感覺都冇？」
12:12我回應
「我同你仲有咩好講？」
回應冷淡到我而家睇番都覺得凍
相信果刻佢都好難受...
Part 4
回說番第二日
當settle好事情後
老婆又回復番靈魂出竅既狀態
但係喺其他人面前並冇表露出黎
包括一齊住既阿媽
每晚食飯後佢先走出露台飲酒
眼淚無情白事咁流
就算知道靠飲酒唔好
但我都冇其他可以令佢舒服D既辦法
唯有陪住佢
同搶佢D酒飲
等佢冇得飲咁多
佢會突然問我一D關於Emma既野
我盡量避重就輕咁答
而家諗番我覺得唔應該講太多
越知我地去過邊，做過咩
越容易勾起唔開心
越難去回復
日復一日
佢訓又訓唔到，食又食唔到
搞到成個人謝哂
有一晚
佢食食下飯走左去廁所一陣
返出黎明顯係喊過
我果刻個心好酸
好後悔搞到個老婆咁樣
忍唔住都喊埋出黎
但由於阿媽喺度
我都走左入廁所喊
果晚佢叫左我出露台
但同平時唔同，冇帶酒
佢拎左支兩間既驗孕棒出黎
「恭喜你呀，你又搞大左人個肚喇」
我地計劃左要BB成年
試過一次有暗間但最後都係白果
估唔到喺呢個時候有
仲要三個月內雙響
真係唔知係咪我粒唔知咩星突然好旺定係果排唔知食左咩喇
又或者係個天比我地既一個機會
可能係為BB好
又可能係經濟考慮
老婆冇離開到
（希望之後都唔會啦）
老婆當日起就冇再飲酒
但由於懷孕初期情緒波幅好大
加上之前飲左好多酒
BB開頭有作小產
好彩慢慢穩定番落黎
而家BB雖然比平均細左少少
但都好健康
如無意外兩星期後出世
今次事件令老婆有抑鬱症
為左BB，佢願意去見精神科醫生／心理學家／社工
托賴呢九個半月黎佢既一直慢慢好轉
但我知道呢條刺插得好深，好傷
冇可能一時三刻可以平服到
但我亦唔急於一時
我預左要用好多年去將信任重新建立
亦預左有機會等唔到呢一日
但...反正預計唔到既
就唯有盡力做好自己
今日既我仍然咸濕
見到靚女仍然會有歪念
甚至...我仍然會諗起Emma
但面對一D機會，我會選擇迴避
因為我知道咩係對我最重要
同埋我知道我已經輸唔起
關於Emma
谷鬼氣...都係講清楚D
識佢既時候我未結婚，但已經同左我老婆一齊
不過我冇請佢
好多少見既香港同事都冇請
佢地夾錢買左份禮物比我
佢都有份夾
所以佢知道我要結婚既
我同佢既關係係結婚之後先開始
經歷兩年
過程就唔講喇
總知我唔係被迫既已經難辭其咎
我提出過好多終止
原因（主要）唔係良心發現
而係怕有日會穿
而失敗既原因....明架啦
一段秘密關係
最需要既係信任
同佢岩岩開始時我有不停咁勸停佢
佢講過一句說話：「我好清楚自己做緊咩」
就係呢句說話令我覺得呢段關係係安全既
直至佢有左先出現變數
雖然講起點解會有又係另一個話題
但我唔係想要為自己辯護
精係我自願射既
我係衰我係PK我係賤
我都認
但我之後唔會
打呢段既目的係相講清楚
呢個Emma唔係被朦騙既
有人話過一隻手掌拍唔響
我地三個只有我老婆係受害者
（完）
***********
後記：
其實我寫得出黎就預左比人鬧
唔會介意，亦冇得介意
因為係我應得既
但唔該鬧我好喇，唔好扯埋BB落水
呢單野我老婆唔肯同人講（除左醫生／社工果D第三方）
亦唔比我同人講
因為我地識左好耐
互相既朋友好多都識既
其實我自己都好抑壓
睇完前晚果集
又諗番好多野
加上呢幾日喺公司冇野做
所以喺度舒發下
P.S. 我唔係舊館員，之前冇用開forum
本來諗住喺高登寫既（Emma既部份可能會多D添）
但原來要某D email 先開到acc
Baby Kingdom 又怕比老婆見到
所以最後喺度post
關於落BB
好多人話我對小三BB狠
事情已經過左去
而家講咩都已經冇用
但我想客觀討論下
唔落...咁可以點？
1. 離婚同小三一齊
咁大婆母子點算？
2. 唔離婚，繼續keep關係
3. 唔離婚，唔keep關係，但供養小三母子
我有比呢個offer佢，但佢唔接受
事實上我都唔認為咁樣係對佢地好既
BB係會出到世
但要喺咁唔健全既環境下成長
真係好？
P.S. 唔使講：「如果你當初唔點點點咪冇事囉」
我知...我都想有如果
************
網友：
就像我老婆一樣比我發現個在宏景花園地產行二作地產中介Sales 晚晚打電話發情慾信息比我見到打比他叫他不要攪人老婆，亦打去公司投訢，個經理無理我就話私人問題，我話借你公司名打來扮推銷媾人老婆，問是否他是他公司員二話系，他間公司我不知是否合伙人，所以真系小心咁玩家，你有錢去叫雞玩女人不關我事，但系個地產行中介蕭宏宗搵到錢去到玩人老婆攪人老婆害個細佬無書讀，攪到要去求學校收生，到現在還是玩個女人，等個女拿走所有錢去幫他，他買左層樓，大家真系去過邊搵樓真系小心他經常轉店帶客睇樓，慈雲山鑽石山出沒多有時見他按公司電話真系不知他媾女還是什麼的，一個比個真正地產玩家攪到個家沒了錢沒了身無分文，樓主老婆比機會你 就要珍惜，不要再背叛，受傷不是你 ，但系受害是愛你女人，你傷害了個第三者，你都有好大責任，個女人想要她位好正常，就像劉生咁庶呂小姐咁
來源：香討
樓主ID：真-幕後玩家
詳細討論：
文章來源: https://www.twgreatdaily.com/cat120/node1352224
轉載請註明來源：今天頭條