【Pokemon Go】[9估] 傳說神獸究竟要點捉？

玩過《PKM》系列都知神獸只係得一隻，唔會好似公廁蝠咁周街都係，但係大家有無諗過《Pokemon Go》將來又會點樣加入神獸？又要夠珍貴又要人人都有機會捉到，點做先最公平呢又。

１．人人有份型

每個帳號都會有一隻屬於自己嘅神獸，而且會不斷喺唔同地方短暫出現。由於人人眼中所見都唔同，一來唔洗爭，二來亦唔能夠透上網上SHARE資訊去追縱位置。

２．圍毆型

神獸會喺著名地標出現，就好似GAME出之前條宣傳片咁，一眾玩家各自派出精靈去擊敗佢再捕捉，有份打嘅人都有機會拎到，手快有手慢無！

３．踢館型

記唔記得劇場版套《超夢夢反擊戰》？超夢夢當時喺個道場同玩家對戰，《Pokemon Go》其實可以參考呢個做法，安排幾間由神獸霸佔嘅全新道場，玩家擊敗佢之後就當捉到．．．但如果係咁嘅話道場位置就要定得好小心囉！

４．隨機型

大家有無玩過《PKM 金／銀》？水君、炎帝、雷公每次都係忽然出現，但你就只可以打一個回合，第二回合神獸就會走佬，套用返入《Pokemon Go》就會變成玩家會隨機遇到神獸，但係就會極速逃走，捉唔捉到就要睇彩數喇。

５．地區限定型

目前《Pokemon Go》都有地區限定精靈，如果連神獸都只會喺全球幾大地區限定出現又有無得諗？

以上內容純屬FF，如有雷同，實屬好彩。

轉載請註明來源：今天頭條