最近同女性朋友討論「叔控」呢個話題，先知原來唔少廿幾歲嘅女仔都鍾意大叔，鍾情三十幾歲嘅男人，甚至有意同佢哋發展。
一個女仔同小編講，佢曾經拍過好多次拖，都系同差唔多歲數嘅人一齊，但最終都系失敗收場。
後來佢遇上咗依家嘅男友，大過佢十五年嘅「叔叔」，感情生活先開始穩定落嚟。佢話，佢覺得自己終於搵到知音了。仲話男朋友因為佢而變得更加年青，朋友都笑男朋友「入花叢」。
唔少女性朋友都指出，「叔叔」有一定嘅工作、生活經驗，可以為自己提供意見，可話系生命上嘅導師，而且佢哋經歷過情場，自然亦會較諒解女仔嘅思維，更識得照顧女仔。
系就系咁講，鍾意「叔叔」同同「叔叔」拍拖始終系兩回事，兩個人嘅成長環境，仲有價值觀嘅距離點都有啲大，要點樣相互協調，就要睇兩個人嘅努力喇。
「叔控」呢個詞語來自日本動漫界，原指迷戀動漫中嘅「大叔」角色，後指二十歲左右嘅女仔情迷於三十五至四十多歲嘅男子，必須系事業有成，性格溫柔，生活亦好有格調果種。
咁睇嚟，呢種「大叔」實在難求，如果事業有成，有一定嘅「資本」，又點會愛上一個普通女仔咧？
之前見過一位年約四十歲，有一定工作成就嘅「叔叔」，佢同緊一個十八歲嘅少女拍拖。
我問佢點解會搵個咁嘅細路女嚟做女朋友，佢話依家乜都睇錢嘅喇，自己有車有樓，唔怕無人鍾意架，若然要拍拖，梗系要搵個年輕貌美嘅。
對佢嚟講，拍拖某程度上只系交易，佢著重於「我可以俾到你乜嘢」，「佢又俾咗我乜嘢」，兩個人喺埋一齊，只系各取所需。
雖然我覺得咁睇「拍拖」未免又太過可悲，但每個人對於戀愛有唔同態度，都系可以理解嘅。
其實無論你「叔控」、「姐控」、「妹控」、「弟控」…… 乜都好，自己開心就得啦，畢竟都系自己嘅選擇。大家又點睇啊？