羅仲謙同太太楊怡尋日終於返到香港，羅仲謙更解釋咗點解去古堡結婚，話希望太太好似公主咁出嫁。
查實小編身邊好多朋友求婚或者結婚時，比起佢哋平時嘅低調性格，都相對高調！
做咗咁多年朋友，私下都會問，呢個系你哋理想中求婚嘅場景或者婚禮嘛？
答案多數都唔系。
其實，佢哋無特別鍾意。只不過，系男朋友/老公一番心意，唔想潑冷水。
小編初初都會疑惑，呢個男人求得婚唔系應該好了解對方性格咩？點解明知你未必欣賞咁高調嘅方式但要咁樣呈現呢？明明呢啲男人平時都唔似想做王子。
後來了解到，其實無人會100%了解另一半，但當你嘅男朋友/老公希望高調咁俾人知道佢對你好，大家就欣然接受吧！佢希望全世界知道你幸福，就系一種愛嘅表現吧！
曾經有一個朋友叫我陪佢買求婚戒指，當時我俾咗幾個選擇佢，佢有啲猶疑，諗咗一陣同我講：「既然都諗住結婚，就俾能力範圍最好嘅嘢對方。」小編一直記住佢呢句說話，因為我感覺到佢嘅真心。
就算女方唔系公主，但男方希望當你系公主呢份心意，就應該好好珍惜同感謝。