Mary好鍾意叫阿強做「衰人」。
「衰人！」帶啲責備嘅語氣，又有啲重視。
阿強每每聽到Mary叫佢做「衰人」，都會皺皺眉頭，然後反擊：「唔好叫我做衰人好無呀，我有幾衰呀？」
「有呀，你繫世界上最衰既人！」Mary得意咁笑。
記得有一次，阿強遲到，Mary打電話俾佢，問佢喺邊度：「衰人，你去咗邊？」
呢鋪阿強終於「認衰」，支支吾吾：「遲咗出門口，要屙屎～就到！」
「咁屙曬未？」
「今晚再屙～」
阿強總係為咗氹Mary而占下風。
「衰人，快啲死返嚟呀！」有一晚Mary喊住咁話。人總有脆弱嘅時候，但因為工作嘅原因，阿強經常陪唔到Mary。
「得啦，我最衰啦，你乖啦，唔好喊，錫返。」阿強輕聲細語。
「你系全世界最衰嘅人！」
喺阿強面前，Mary總系好放心咁撒野。而阿強，永遠都願意退一步，縱容Mary，容許Mary繼續發小脾氣。
「系我最衰啦，我一定衰過啲一腳踏兩船嘅人，衰過啲又煙又酒又嫖又賭嘅人啦～」阿強笑住咁話，Mary亦都跟住笑。
其實阿強好好，但Mary總系鍾意講反話。唔知道點解，女仔特別鍾意講反話，唔通系想保留一啲神秘感？定只系撒嬌嘅一種方式？
「衰人，你可唔可以唔好對我咁好？」一千零一次，Mary終於讚揚阿強的好。個晚佢哋約喺珠江邊見面，阿強買咗一杯暖笠笠嘅熱咖啡俾Mary。
「對你咁好，你都叫我做衰人？」阿強扮嬲。
「繼續叫你做衰人，你先有動力進步呀！」Mary飲咗一啖熱咖啡，然後遞俾阿強。
「咁你幾時先叫我做好人？」阿強追問。
「哈，唔知呢？」Mary急步跑向前，阿強從後追上。
「喂！等埋！」
雖然Mary總系鍾意叫阿強做「衰人」，但Mary心入邊，阿強系一個大好人，最好嘅男朋友，最佳……