神劇《來自星星的你》喺前年播完後，韓劇界沉寂多時，終於今年由「雙宋」宋慧喬同宋仲基主演嘅《太陽的後裔》成功接「雙賢」全智賢同金秀賢之棒。上月首播如平地一聲雷，再次燃燒劇迷追劇雄心，特別系雙宋一段進展神速嘅姊弟戀曲，更令人津津樂道。
《太陽》不但喺韓國火熱，嗯股風氣亦吹到中港台三地，無論收視、話題同點擊率，《太陽》亦不斷狙擊《星星》，有望成為下一出神劇。
由宋慧喬、宋仲基、陳久同金智媛主演嘅KBS新劇《太陽的後裔》自上月24日首播後，就以超高14.3％收視開播，撼贏同日首播、由Rain、李敏貞等主演嘅SBS新劇《回來吧大叔》，穩坐水木劇（逢周三及周四播出）收視冠軍寶座。播到第3集收視更突破逾20％收視，威過《星星》第4集先破20％；至前晚第6集收視再升多1.1％，錄得28.5％創新高，僅播出6集就超越咗全智賢嘅神劇《星星》大結局創下嘅28.1％收視紀錄，令KBS台沉寂4年後再度獲得收視逾20％嘅水木劇集。
自《太陽》開播後，已受到各方關注，內地頭兩集點擊率已超過4億人次，外界都睇好《太陽》將打破《星星》21集錄得32億點擊人次嘅紀錄。現時《太陽》已播出6集，除咗因為俊男配美女吸引外，劇迷最關注系「雙宋」呢度姊弟戀。劇中喬妹飾演34歲海星醫院駐外醫生薑暮煙，而宋仲基則飾演33歲特戰部隊大尉，兩人因為一部手機而相遇種下情根，浪漫得來又唔算老土。而且《太陽》嘅劇情推進得甚快，首集兩人已一見鍾情，但第2集二人又因為愛情事業難兼顧，最終決定斬掉情絲，殊不知到第3集已事隔8個月，佢哋再於異地相遇，愛情種子再度爆發，第4集進擊嘅宋仲基更man爆咀喬妹，上演一場「紅酒之吻」，上一集就大玩英雄救美橋段，雙宋更兩度咀嘴。
現實中「雙宋」實際年齡相差4年，不過喺出道20年嘅喬妹身上絕對睇不出歲月嘅痕跡，所以即使34歲嘅喬妹夥拍30歲嘅宋仲基大演愛情戲碼亦非常合襯。