無論系商場定系地鐵站，每次搭親電梯，不論上定落，阿強總會本能反應咁企喺女朋友Mary慨落一級。
原因好簡單，就繫緊握住大無謂犧牲精神，唔想Mary著短裙走 光。
「要望就望我個屎忽啦你班死變態鹹濕佬！嘩哈哈哈！」
而無乜危險意識慨Mary，對呢種高高在上慨視角表示非常得戚，成日摸阿強個頭，或者熊抱阿強個頭…
「哈哈，原來平時你望住我個視角系咁樣，好得意。」Mary話。
「我平時無好似你咁，系咁拍你個頭啊！」阿強平時只系鍾意捉住Mary個頭嚟聞，覺得佢啲頭髮好香。
「喂喂喂，唔好…成個人壓落嚟…我條頸就嚟90度拗柴啦…」阿強繼續抗議。
「唔得啊～萬一你望其他女仔裙底咁點算！」
「呃…呃…我唔會…我絕對唔會！」
正當阿強條頸被拗後，被逼仰望住個商場天花板，沉醉喺呢個奇妙慨仰視角。
阿強瞄到隔離電梯有一對情侶，一高一低咁喺電梯度打車輪，個男慨好似就斷氣咁表情痛苦。
阿強突然間覺悟，每一段如膠似漆慨愛情，大概都會有令人窒息慨感覺，條頸拗柴又算得乜喎…
電梯到達地面，阿強Mary又回復返熟悉慨高度差距。
但系…
「喂！你仲唔落返嚟？！我條頸斷啦！」Mary雙手環抱住阿強條頸，懸吊喺半空。
「唔落啊！我系樹熊嚟！你有冇見過樹熊落地行路吖？」老老實實，又真系未見過…
阿強只好咬緊牙關，將Mary吊住去下一條電梯。
行上電梯，阿強又再次望住個天花板…
大概每一段愛情，都需要一份堅持同執著啩…