cc photo by flickr user Nicola Albertini
家用哩家野，無論系父母子女之間，定系夫婦之間，都有可能引發世界大戰。早幾日見倒forum 有人討論老公應該俾幾多家用，「想我留喺屋企做煮飯婆，首先我老公要每個月放低二萬五俾我。」記得第一次聽到朋友Jane 講哩句說話，我凈系覺得佢好霸氣，當香港男士月入中位數系一萬六千五百，佢要二萬五先會考慮做家庭主婦。
後來Jane 小姐計俾我睇：我屋企得我一個女，每個月七千蚊家用已經唔算多，就算我唔食都一定要養父母先。一頭家洗費好多，凈系水電媒差銄管理費上網電話，加加埋埋都已經過二千，供樓一萬，買餸加埋家居雜項（晚晚兩餸一湯），其實已經所剩無幾。剩低小小做零用，買胸圍底褲潤膚膏M巾都靠曬佢，同朋友食多餐飯都唔多鬆動。原本我而家都搵緊二萬五一個月，扣返父母家用，夾一半供樓同家用，自己都仲有萬三蚊，就算間中同老公出街食下飯，有時間又煮下飯咁，都最少凈返一萬幾千可以用，有啲私己錢之餘仲可以送下禮物俾老公，又唔洗買套胸圍底褲都要問老公claim。想我留喺屋企做煮飯婆，每個月放低二萬五其實都系應付返頭家既開支，同埋我基本洗費。又要煮飯，零用錢又少左咁多，其實我仲蝕左，但自己煮飯的確健康啲。
聽完Jane 小姐咁樣計，我終於明白點解佢老公咁鍾意老婆去返工，難得Jane 小姐搵倒返得開心（仲要準時放工又準時出糧）既工，又可以分擔供樓同家用，唔洗每個月一出糧就去左二萬五先，實在真心支持老婆繼續服務社會咁話。但其實Jane 小姐只系代表住小部分大專學歷既香港女性（可以準時收工攞二萬五仲唔系小部分？），而其他大部分高學歷女性，就系遲收工仲要兼顧家庭，有啲仲要放工返到屋企煮飯，因為即使幸運到買倒樓，供完樓已經無錢請家傭幫手。
最近家計會推出新廣告，其中提到只要早計劃就「生一隊籃球隊都可以」。但好多年輕情侶，一早已經計劃，但就連買樓結婚都未結到。到上倒車，開始供樓，又開始掙扎如果有小朋友，爸爸／媽媽可以辭工喺屋企照顧小朋友嗎？家傭只可以幫忙家務，唔可以幫忙教小朋友，但以Jane小姐為例，如果將來生小朋友後再辭工轉為全職主婦的話，家用已經唔系二萬五可以應付。而且，上車盤通常只有三四百呎，生完一個，都唔敢諗生第二個。到換倒大單位，兼有錢請家傭，仲有能力養兩個小朋友，太太已是高齡，分分鐘接近更年期。一代比一代遲婚遲生，祖父母普遍年紀越來越大，所以以往可以「父母幫手睇住」只會越來越少，所以單單考虜要由家傭照顧，定系自己全職湊，已經有排諗。而且經濟條件同居住條件方面，「早啲開始計劃」都計劃唔倒我幾時可以換大單位，幾時可以再升職加薪，幾時可以一份糧養一家人。