日前有網友捕獲穿皮草的夏蕙，不值BB著用動物屍體的行為。(網上圖片)
時下公關唔易做，一不留神容易釀成關公災難，大企業如連卡佛、Godiva都試過中招。月前立法會議員葉劉淑儀頻穿皮草出席活動遭到各界批評，葉劉反指「環團思想守舊」，又謂「養殖Mink比養雞養牛更人道，潮流已經轉咗」，一秒辣㷫巴絲。
香港瑰寶黃夏蕙出名玩得，原來EQ仲相當高！日前有女網友喺火車上捕獲野生夏蕙，不過該名絲打對於夏蕙BB穿著皮草表示睇唔過眼，仲喺Facebook直斥：「黃夏蕙坐在我隔離，我跟動物屍體一起坐。」以為網友會一面倒聲討鬧爆嗎？高智慧的夏蕙BB噚日就神回覆：「妹妹，唔好傷心啦，件衫40年前亡夫胡生(胡百全)買俾我㗎，嗰陣都唔知道有環保，至多下次唔著啦。」
夏蕙BB高EQ神回!(網上圖片)
簡單而正面慨回應反而深得巴絲歡心，夏蕙BB喺一夜之間獲得1萬7千個like、近2500人話「勁正」、700幾人嚇親、500幾個「哈哈」！
「算你啦，下次唔好啦～」
「得體、得體回應。」
「乖啦以後唔好啦，知無！」
「好關公～」
「 正視，回應，解釋，作對應行動。真系沒有反對她的理由！」
「夏蕙姨果然系有智慧的女士，喜歡你！」
「40年前唔怪你，唔好再買啦。」
「夏惠BB公關技巧好過政客好多。」
「夏惠BB答得大方又得體，真人梗加nice到爆。」
「好環保，40年前產物著到依家！仲要好有記念價值！」
獲巴絲激贊好關公。(網上圖片)
夏蕙BB認錯後，一眾網友即時嬲唔落。(網上圖片)
今次BB完美演繹：「錯就要認，打要企定。」葉劉學嘢啦！