周永恆(Roy)前年因背妻趙頌茹(阿Yu)，偷㗳O靚模劉依靜(Ruby)，之後再被揭打妻，搞到阿Yu要報警，事後更心淡，要同佢離婚，離婚手續o依家仲搞緊。Roy曾自認「人渣」，但仍然好多女埋身。曾經同o靚模周芷儀扯上關係，最近又搭上擁34D身材嘅新o靚模女友黃芊詠(Cherie)，佢哋仲成日夫唱婦隨般喺網上曬恩愛。
日前Roy被周刊影到同新歡去開房，今日讀者鍾小姐就爆料指Cherie前日喺17app疑似玩床上直播，雖然相片有點朦，但見到剪咗MK金髮嘅Roy同佢嘅黑色頸鏈。相中見到Roy冇著衫大曬胸肌，喺Cherie身後整咗個ok手勢，雖然Cherie只係得個大頭樣，但兩人睡眼惺忪好似好攰咁。
今日《蘋果》打俾Cherie，佢就否認影床照，佢話﹕「係前晚搞直播，梳化嚟㗎咋，唔係床嚟，佢喺我屋企不嬲都唔著衫，但有著褲，我有著衫㗎。」另外，有報導指Roy脾氣狂躁，經常同Cherie嗌大交，好多人喺fb留言鬧爆Roy喺衰男人，Roy亦唔示弱，將留言者的相貌cap圖進行大反擊，還帶點挑釁說﹕「來吧！唔好X up。」
黃芊詠(Cherie)否認於社交網玩床上直播。
有指前日Cherie於社交網17做床上直播。
日前周永恆自拍片段上網，與日前床上直播嘅髮型相同。
Cherie不時於社交網上載與周永恆的甜蜜照。 Cherie不時大曬34D嘅好身材。
周永恆之前與o靚模周芷儀傳緋聞。
劉依靜之前介入周永恆與趙頌茹嘅婚姻。