先講自己少少背景先.
中學時拍過一次拖,之後....就無啦...基本上自己無咩壓力...曾經,無拖拍迷無拖拍,繼續我的宅女生活,但大約由二十五開始...就醒覺.
曾經有一個最close的朋友,非常積極叫我同佢一齊參加speed dating,但我總是拒絕,因為覺得個模式唔適合我.
要脫宅,就要參加活動,但身邊的朋友都係女仔,而且小貓三四隻.所以我就join運動玩.
一來,自己本身鐘意,二來,可以識到朋友,都唔係為識男仔去,識到女仔朋友一樣開心,所以join左好多女仔group活動.
但係,可能我年齡真係好大,而果啲group的member又真係好年青,無一倖免地,喜歡上我的,都係細我約5年...
或者年齡唔係一個問題,我都有同其中一個發展過,但發現佢,同其他幾個都一樣,
其實只係想曖昧,所以都係無辦法開花結果.
我雖然參加好多活動,但其實我好靜,靜到有時朋友會問我做咩咁靜,其實我都唔想,尤其大家都好talkative時,我就會更加做聆聽果個.
呢幾年,眼見group起了變化,一係有人搞分化,一係靜曬,一係變左90後member為主(我80後),一係愈來愈多年長及一家大細加入.話題有時圍繞到照顧小朋友.
其實,如果純為興趣,有呢幾group人都足夠,所以都無動力入新group.但我知道安於現狀,應該識唔到另一半.
然後我又試下用另一個方法跳出comfort zone.就係網上識人,不過會好擔心,究竟人地係迷真心,定係速食,
所以add過的人,5隻手指數得曬,而約出來的,就只有一個,而果餐飯,亦令我好有bad feeling.
覺得,起app傾計的感覺同真人,原來可以相差咁遠.咁不如一開始就面對面傾,所以就join左相睇公司啦.
間公司,就係要答一堆問題,然後開個profile比你,入面有少少基本資料,相片.等人地睇到你.
同時,你會有一個list,入面有好多男member的profile,每個都有個分數,代表你地有幾夾.有意思的,就可以邀請佢食餐飯.
初初join,我仲係二字尾,加上新member,所以好快收到好幾個邀請,到我步入3字頭...就少好多啦,加上離離去去都係果堆member,
一開始有意思就已經invite左,無意思,等幾耐都係無.
咁我不如講下我的經驗比大家聽下.
一開始我有少少來者不拒,因為個profile的資料真係個個都差唔多.你好難知佢到底係個點ge人,所以可以的話,都見面了解下.
果期係幾攰下,因為初初都會諗,可能下一個就係,而餐飯係要用好多心機同精力去互相了解,但最後都係一個接一個失敗...
第一個,大我好幾年,佢對我來說係一個打擊
.而我對佢可能都係
.當佢知道我係第一次join,佢好似有啲失望.
佢好無奈地話,都唔知點解差唔多次次見面的女仔都係第一次.佢咁唔鐘意,我都明點解,因為人係鐘意有選擇有比較.
所以會睇多幾個先發展,而且第一個通常都問埋好多關於呢間公司個系統的問題,對於食呢類dinner的經驗.
餐飯唔係食左好耐,但佢話因為工作要輪班,好攰,所以要早啲返屋企,所以好早就賣單,
但真相...估都估到唔係咁.可能出於禮貌上,佢有問我contact,但最後都唔係好同我whatsapp.
我有反省下自己衰咩,係我邊方面有問題.但通常有問題的人,都唔知自己衰咩,知道自己衰咩,又未必可以改到.最多可以睇分數.
無錯,好搞笑,見完面,累積幾個人後,有得睇對方比你的平均分.唔會知邊幾個有分比分,更加唔知佢地個別比幾多分.
我只看過自己分數兩次.我覺得只係鼓勵分,實質其實無咩意思.
後來識到有一個,好夾
,食飯食到雞啄唔斷幾個鐘,約左出來都好幾次,次次都食飯.佢係一個好有禮貌的人,好gentleman.
不過,我地愈來愈少話題,直到有一晚我地去到dead air左好耐.或者果刻發現,原來起果一個我地唯一的共同興趣上可以傾天光,
但離開果個話題,就成個世界...靜曬...佢後來無搵我啦,我有搵過佢,但佢已經唔多想同我傾計.
佢曾經講過,佢同我都係個慢熱的人,所以佢之前見過的女仔,都出左幾次街,先了解到對方唔係miss right,
而佢都同我講過,佢係仙女散花,就係一次過會邀請好多女仔,睇下邊個會出,雖然佢討厭咁樣,但佢唔咁做,可能望穿秋水.
佢令我明白到,唔好以為比邀請我果的人,真係睇到我寫果少少簡介個profile而有共鳴想識我,實質我可能係魚翁撒網入面其中一條魚.
而有一個,佢係第一次食呢類晚飯,佢都好坦白同我講,佢想見多幾個女仔.
唔知幾多日零contact後,我同佢講做唔到情人,都可以做下朋友,佢終於都約我,不過就時間好唔夾,變左又係果種"搵日出來行山"個frd,
邊一日呢?唔知,佢叫我等佢比時間我.我其實都唔抱希望.事關不久前先領略完有member講完"搵日出來踩單車"後就失蹤左.
點知,起N日後,佢真係有約我.其後仲出過幾次,而我心諗都可能有機會發展下.但係後來佢用one day mode回應我.
就係果種,佢唔會主動同你傾計,而你問佢野,佢會用一日時間來回你一句果種.究竟我又衰咩呢,想知,但就係唔問.但無論點,我都係佢比較完後,唔係最好果個.
或者今日情人節,幾個鐘之前,收到其中一位男仕的問候.
呢個相睇網站,其實都有少少由得member自生自滅.佢當初講的服務其實係無乜,而你發邀請後,對方又接受,佢地會幫手book餐廳,然後send電郵同sms你知個時間地點.
至於你係迷有睇,佢地唔會理.所以我每次出席,尤其對方唔見影時,我都心諗,
對方會唔會未check e-mail/sms,會唔會太耐唔記得,萬一佢唔show up,我食少少野走好定點呢.
而呢個男仔佢一直都唔見人,我等到覺得有啲尷尬有啲呆滯,因為果啲餐館職員係知道我係來相睇,所以佢地都會好八掛咁望,
而其他檯都坐滿曬,但我就咁耐都未點野食,好似生人霸死地咁
.起我等到覺得絕望時,諗住打去間公司查詢時,個職員就打左來.
原來個男仔搞錯地點
,不過我無怪佢,最多係佢太大意.因為間公司一改再改個地點,搞到好混亂,
而佢都算體貼咁叫個staff同我講聲,又say好多次sorry,所以反而我係加左印象分.
果晚間餐廳好嘈,嘈到有少少似去左酒巴種feel,有啲聽唔到佢講野.我地傾到去呢間相睇公司上面.
好奇之下,我都會問對方,點解你會邀請我,通常的答案都係合眼緣
,好少會話"因為我睇完你寫啲簡介".
但係相片其實係會呃人,佢話佢比人呃過...相同真人好唔同,差啲認唔到果個女仔.咁我多口問,咁你覺得我張相同我真人似唔似
其實我問果時都有少少心虧
,因為一定揀過先放
.咁真相係點我唔會知,但佢點會當口當面話"頭先差啲認你唔到"
咁講起相,我就提到,我發現左,男member係好鐘意放工作相出來,同埋好鐘意同自己部車影相.
可能男仕鐘意show成就掛.但我就鐘意casual wear的,感覺親切啲
.咁我就八掛問佢,其實女會員係點,會唔會好誇張,化妝,三七面,高抄的相呢?
點知佢就提議不如各自用手機開自己個account,然後交換電話咁望下,究竟同性member的profile係點.
原來女性member係好普通的生活照,通常兩三張相.無女神相的拍攝手法,我覺得都幾親切,樣子平凡得來又唔差.
每次食飯,我都係對方叫埋單後,我就好快拎個銀包出來AA制,但佢,係第一個叫我收返個銀包話請我.
雖然佢請我食飯,但就無特別意思,因為佢話佢次次都會請女仔.而事實上證明,佢都係無點理我,曾經講過搵日一齊踩單車.
而"搵日一齊踩單車"其實係"搵日一齊飯茶"個friend.見到佢講呢句,我都知道呢一日,係唔會出現.
通常無意思,就唔會再聯絡,彷彿係一個遊戲規則一樣.不過佢係少有,對我無意思,但過時過節又會彈出來問我最近點,
而佢的問候一定係會包含要你答佢有伴未.而答完無,佢都係唔會約你.或者,佢只係想知,join咁耐都未搵到伴唔止佢一個掛....
提起果個分數,即係每位MEMBER同我有幾夾果個分數.
我一開始會幾睇重,因為佢一次過show幾百個男member比我,如果delete左,又好快出過新一批.
睇到我唔想睇,我都無可能幾百個逐個見.雖則我知90分個數字係個網吹大左,但因為大量都係90分以上,所以80樓下我就好似大屠殺咁delete左.
事後..我後悔了...
因為後來感覺到其實個分數都唔代表夾,係代表有幾似.90分以上見過果啲,都係有同我相同個性,好靜好宅好被動.
當兩個好靜好宅好被動的人在一起,未必係好事.
雖然我係靜,但差不多每次食飯,我都係多野講過男仔果個.不過話題其實都係好傳統果啲,講下大家興趣,平日做咩.
咁有次有個男仔,佢又係傳統男member職業.一開始佢好formal咁自我介紹,好長好長的一個自我"工作"介紹,95%都係講緊工作.
我報以一個微笑後,佢問我笑咩?我話好似job interview.但無諗到成餐飯,again,都係講工作.
佢話佢無其他興趣,佢的工作就係佢的興趣.所以佢空閒時間,都係鑽研點樣寫program去解決問題.
興趣太單一,都唔係最大問題.就好似我爸爸一樣,無咩興趣,但就係好爸爸,好老公.
所以同佢講起program同excel好耐,我都有講下自己興趣,不過我每次離題(離開IT),佢就只會禮貌上回答三隻字 "很有趣".
雖然佢好gentleman,心裡明白要了解一個人唔可以一餐飯就當完.但呢餐飯,起未食完,我已經覺得大家係無可能.
所以佢堅持請我食飯,問我拎contact,我其實覺得理虧,白吃人家的飯.
當晚,佢有contact我,但我好冷淡回應,聰明的他也收到signal了.
講下兩單怪野.
話說呢間公司,非常咁鐘意安排人地食義大利餐,價錢大約二百五.
食到我唔想再食,忍唔住打去要求唔好再安排義大利餐.
而呢一次,終於唔係義大利,比左日本餐廳我.
我個心態改變左,由初初諗呢個係迷真命天子呢,今次點打扮好呢,果日睇清楚對方個profile,諗下有咩傾先.
到後來已經好懶懶閒,唔多緊張,當同朋友食餐飯.餵食的我,search Open rice仲多過睇profile,諗都係諗食咩好.
第一次去食日本餐廳,我早左到,果時覺得好無奈.無奈係,點解今次唔係二人位.係四人位...
旁邊兩個食客同我地同一檯.....咁一陣個男仔一坐低問我係唔係xxx,隔離兩位迷食花生等睇戲.
食還食,希望唔好忍唔住笑.
好彩,我地呢餐飯好似朋友咁傾計,隔離檯未必發現我地相睇緊.其實餐飯都無咩野,只係有一點我覺得怪怪地,
通常第一次食飯,好少問人地過去啲情史.除非對方主動問我,我先會問返人轉頭.
當我地講起睇戲,佢就提起佢女朋友.佢話戲院唔係只係睇戲,仲有好多野可以做.我問係咩.
佢就講佢同佢女朋友,以前起戲院會做啲野,唔見得光,但唔方便講我知係咩.
大哥你在說什麼? 我都開始想轉另一話題了,佢又叉返去,又講多次,同樣地唔講係咩事,比個空間我自己諗.
其實我無興趣知...
如果我諗錯隔離,真係對佢唔好意思.
而我地都係對方生命中的過客,事後無點聯絡啦.
其實都未係好怪,另一單仲怪....
有試過,兩次打開facebook見到其中兩個男member add我.又試過有個男member主動問我拎fb,我都無比.
如果係普通朋友問,我會比,因為fb無咩特別野.但係短時間內,fb多左班相睇男仔,我覺得有啲怪,所以一律唔比.
一來,以前試過比兩個對我有意思的男仔,add完fb後,由幾年前啲舊post開始掃,又洗版式咁like啲舊相新post.
二來,呢個見到果個add,果個見到呢個係咁like,而果個又講埋啲唔知乜野.我夾起中間覺得好怪...
而最近食飯,個男仔遲大到
,佢有理由,但唔充分,因為預測到早啲到就唔使遲,所以no excuse
.
呢個男仔加入member後,好短時間內已經見左好幾個女仔.
佢係唯一一個,餐飯都未食完就問電話號碼同fb的人,我其實唔想比,不過唔知點拒絕都係比左...
餐飯無咩特別,佢話要請我食飯,下次食飯到我請返佢.然後,佢話不如出去行下,但因為落雨,改左食糖水.
佢就提議,不如外賣糖水,再車我去一個好靚的地方一齊食糖水啦.
起果一區,我大約估到佢想去邊.因為之前有個男仔都車我去過,加上懶神秘,我就無叫佢話我知去邊.
佢話果個地方一去無回頭,我無得後悔. 無耐,路線偏離左我以為的目的地.我就問乜唔係去果度果度咩.
佢話我估錯左,但無開估我知係邊,到我知道時已經返唔到轉頭啦.原來沿單程路上緊飛鵝山.
試諗下,一對情侶,起飛鵝山山頂,居高林下望住香港的夜境,食住糖水,幾sweet sweet呀~
不過果晚好大霧,大到駕車要龜速咁上山.上到山頂,根本無出過車,一出個身會濕曬,亦都無可能望到風境.
一個女人仔同一個初相識的男仔,月黑風高,起山頂上面,四野無人起駕車到.你話可以做啲乜?
就係睇fb食糖水....
Oh my god....第一次見面,乜唔係一齊傾計了解下,而係各自各玩手機睇fb.咁大個真人起面前都要低頭掃fb.其實好怪...
佢話我地互相開大家的fb掃下,了解下喎.可能佢覺得無咩話題,就想用fb搵話題.
佢好熱愛佢的工作,所以起fb搵佢工作啲相比我睇,仲要拎張支票出來話我知佢今日好開心接到單生意.但我無睇張支票.
因為我替你高興,但我無必要知你搵幾多,而且金錢呢啲數字太敏感.
後來佢熄左車箱內的燈,黑曬....佢問我驚唔驚? 我知自己粉退花殘,但新聞話80歲阿婆都慘遭安祿山之爪,你想我點答你.
好彩之後佢開返燈比我,過一陣,佢又熄返燈.大哥你唔好玩我...
之後我就同佢講,我好攰,係時候返屋企.
其實除左熄燈果兩次搞到個心離一離,佢分人又無咩野,仲有講有笑,感覺上都係一個好人來.
不過之後音訊全無.我無搵佢,佢無搵我.幾星期後,我unfriend埋佢fb啦.我諗佢最近都係忙緊dating.
其實我唔建議男仔show off自己啲身家,去相睇的女仔其實都好平凡,想搵個伴安安定定生活,
如果對方貪你錢先同你一齊,都無意思啦~
via：http://www.discuss.com.hk/viewthread.php?tid=25538283&page=1&authorid=5838203