本身咁Seven既野唔應該打出黎，盞俾人笑到面黃
但我唔打出黎，個心就un住un住
我都係人，我都希望有人關心下我。
以下請允許我將呢兩個月發生既經歷講曬出黎。
已經好耐冇翻大陸探爺爺嫲嫲，畢竟我唔想俾佢地見到我落魄至做倉務擔擔抬抬，而我都唔想每一次道別個陣因為唔捨得而喊到豬頭咁，我承認我係一個好脆弱好容易受人影響既野，所以為咗專心賺錢，我已經唔想返大陸。
直到舊年爺爺嫲嫲相繼入院，我先如夢初醒，明白到親人在生應該多多相聚，莫待到佢地走咗先黎上山拜祭充當孝子孝孫
我承認我做錯咗好多年，於是我覺得應該返大陸過年，陪爺爺嫲嫲過年。
睇住銀行戶口入面既十萬蚊，我忽然覺得根本呢筆錢其實買再多補品都唔及宣布我有女朋友，更能令兩老開心。
佢地一直都希望我拍拖，成家立業，最低限度都要有一個BB。
我唔係冇拍過拖，只不過每一任都係得個靚字，唔係蒲妹，就係好林黛玉性格既宅女，我個人莫講話吃得消，直頭備受折磨，仲點敢帶佢地翻大陸啫。
於是，我都係抱住一試無妨既心態，問咗一位絲打。
絲打，固然係高登認識，啱傾咪發展到whatsapp，而我當得知佢啱啱辭職，而又彷徨緊既時候，我就即刻whatsapp佢。
我：「薑薑，即係咁，我想你做我女朋友，唔好誤會，純粹係扮我女朋友，返大陸見下家長咁，一個月我比返三萬蚊你，絕對唔會要你蝕底。」
薑汁西米露：「去邊呀咁？」
我：「廣州黃埔區。」
薑汁西米露：「 冇問題呀。」
薑汁西米露既直率令我詫異，而我又似乎放下心頭大石，繼續同佢講解點解我要搵佢去。
待薑薑離開後，我開始走去中銀櫃員機double check，嗯，10皮野，今次扮衣錦還鄉實冇死啦。
鄉下班親戚點會知道我喺香港其實係做勞力工作[banghead] 總之返到去廣州就可以扮成功人士。
而我開始每日禁一皮野出黎，然後去買奶粉補品等等，準備拎返去孝敬爺爺嫲嫲，仲有安撫下其他親戚們。
個腦海入面一直都記掛住頭先薑薑個句：「幾得意呀！ 」
唔通佢都對我有好感？係咪會假戲成真咖[bomb]
諗下好啦:-( :-( :-(
返大陸一定唔可以唔記得買奶粉同藥材，老人家最鐘意，咁耐冇見我一定唔可以手軟，於是一口氣買咗5000蚊既野裝返大陸，忽然覺得自己好似水貨客#ng# 偷運香港既物資。
而薑薑開始頻密whatsapp我，問我係邊，做緊乜，越瑣碎既野，佢就講得越多。
自問對靚女既抵抗力係0Z_Z 俾女仔咁纏返，我已經投降。
個一個禮拜，我竟然忍唔住約咗薑薑出黎食飯，一次比一次大膽，一次比一次更多野講。
餐餐埋單500幾都唔肉赤，好似發咗達做左暴發戶咁。
以前既我午餐都唔敢食，要等到吉野家下午茶先狗衝。
家陣食餐日本料理都幾舊，睇黎有靚女陪伴，孤寒既特質都會一掃而空。
而最令我感動既係，每一餐薑薑都會俾返錢俾我，佢話AA制係最fair，唔可以令我破費，佢話最緊要係開心，而唔係錢。
:~( :~( :~(
幸福黎得太快，明知道係做戲，卻唔知點解發覺有戀愛既感覺，到底毒向左走向右走既幻想能力有幾強大，有追我高登post既朋友都會知道[banghead]
話都冇快就到咗禮拜一，我晨早已經去到上水火車站，然後靜候薑薑既到來。
心莫名其妙地跳得好快，今日開始我有女朋友啦#love# #love# #love# 雖然有名無實，但足以令我自豪。
而薑薑一身大方得體既打扮，瞬間就俘虜咗我，亦引來火車站好多麻甩佬既注視，咁如花似玉既女仔，竟然挽起我既手，一齊行上車。
我（細細聲）：「薑薑，其實場戲唔使咁早開演啵[sosad] 」
薑薑：「練定先差唔多咖啦，費事到時候穿煲啦。」
我：「搞到我幾咁唔好意思，我有幾何有女仔撬住手行呀……呵呵好唔習慣。」
薑薑：「天氣凍呀嘛，你咪當我借你體溫lor;-) 」
我：「咁我唔客氣啦。」
餘光偷望身旁的薑薑，如果真係我女朋友就好啦。
長髮貼近我既身體，香味撲過來既感覺真好。
仲有佢耳仔邊掛既飾物
好靚，真係好靚。
莫講話三皮野，六皮野都抵俾。
羅湖火車站果然人來人往嚇死人。我拖住一個行李箱，孭住個書包，論論盡盡，以至於薑薑笑住問我使唔使幫手。
「唔使啦，呢趟旅程，有你喺身旁已經足夠。」
當然咁肉麻既對白我梗係唔會講出黎，因為曲終人便散，不應該太過煽情。只係薑薑對我超出咗做戲既範疇。
讓我既喜悅又興奮。
臨上火車前我仲特登停步，望住薑薑，輕輕撫順佢被風吹亂既頭髮。
我：「真係唔後悔？唔驚我係拐子佬拐走你？」
薑薑：「你唔好不辭而別就得啦，帶我黎，帶我返去就得 」
我：「點解你咁信任我？」
薑薑：「因為我睇過你寫既故，我好肯定你係一個好人，你唔會呃人。」
我：「成個高登都當我係垃圾。」
薑薑：「好多人都知道你唔係垃圾，好多人都支持你咖，包括我。」
我：「多謝呀。」
唔知點解，突然好想喊。
我：「你唔覺得我癡向左走向右走線咩？」
薑薑：「唔會呀，尤其係見咗你之後，更加肯定你唔係壞人。」
我：「有冇人講過你好靚？」
薑薑：「成日都聽到。」
我：「但願我唔好有咩冒犯，請多多得罪！」
薑薑：「例如呢？」
我：「例如偷摸你精緻既臉龐。」
薑薑：「對手唔好凍冰冰就ok既。」
我：「OK;-) 」
踏上和諧號的列車，一個鐘頭左右，已經到咗廣州東站。
嗯，廣州，十幾年冇黎啦。
比起我既感觸，身旁薑薑顯得好雀躍，好似對廣州好好奇。
「點解廣州d人都唔似廣東人既？」
「點解廣州d人唔係講廣東話既？」
「點解綠燈都仲有車行黎行去既？」
「咁多摩托車喺度兜客既？」
我：「薑BB，呢度係中國，符合國情呀。」