亞視冇得續牌，又冇錢出糧，未來生死未定！雖則而家冇人睇亞視，不過，亞視都有過風光歳月！
曾幾何時，亞視嘅電視節目好受歡迎，好似電視劇《我和殭屍有個約會》同《肥貓正傳》都膾炙人口，係一家大細飯檯前嘅必備節目，更加係家家戶戶茶餘飯後嘅話題！
當亞視未結束之前，巴絲們一起回想當年！
日本動畫《蠟筆小新》最令人懷念，細個嗰時唔瞓都要睇，巴打葛來分多都認同！「巴閉閉巴巴閉閉一休僧！真聰明！」耳熟能詳嘅《一休僧和尚》動畫主題曲，旋即徘徊3點壹4一陸口中！巴打天蠍愛上水瓶就話：「《新世紀福音戰士》、《聖石小子》同埋《One Piece》都好鐘意。」
講嚟講去都係動畫！緊係啦！想當年，亞視收購返嚟嘅動畫，比起對手無線出色，咸濕強總結：「識睇卡通片嘅一定係睇亞視 。」
重有《男兒當入樽》、《亂馬1/2》、《幪面超人》等等，肯定有一兩套列入你嘅成長回憶之中。
另外，講亞視，又點可以唔提《百萬富翁》呢？7_仔話自己都上過去玩，只不過出唔到線。
一班親朋戚友坐喺電視機前，邊食飯邊估答案，考驗常識同智慧。官仔骨骨嘅主持人陳啟泰，講句經典「最後答案？」，你又有冇模仿過先？
亞視都有精彩嘅日子，講下亞視畀你嘅美好回憶！