港女數港男，港男嫌港女，呢個topic喺網絡世界真係講唔完，雖然唔理開po的樓主是男是女，最後都係換嚟網友圍插，不過仍然有班勇士繼續喺網上發表對另一伴嘅不滿。近日又有一單，有港女喺17 app素顏玩直播時就力數拍拖多年的男友乜乜乜物物物，搞到想分手。
一如所料港女又被圍插。(網上圖片)
呢段長約1分12秒嘅直播短片喺網上瘋傳，港女喺17app入面以「結婚變分手？」為題開直播，主要數男友4宗罪，除咗冇上進心、成日亂洗錢買貴嘢及冇時間陪女友外，呢位港女最不滿男友去超市買到一袋二袋後，竟然叫港女落樓下幫手拎兼行6層樓梯返屋企，仲話拎到指甲都崩曬，怪責男友點解唔上網買叫人送貨，留番啲時間陪佢睇戲喎。
就係因為呢啲原因，港女想同男友分手，仲叫大家畀下意見，雖然直播時有雄性動物附和港女，支持佢飛男友，不過網友就唔係咁睇。除咗插港女講嘢時太造作，仲鬧佢唔肯同男友一齊拎嘢行6層樓梯勁有問題，話佢係極品港女。亦有網友就認為港女呢個直播太假，似係宣傳網上購物平台嘅廣告。