件事發生喺上星期年廿八，大家都一副準備放假嘅心情。有結婚嘅同事們預早派利是，無結婚嘅就坐定定收利是。
「恭喜發財！」一個連我名都叫唔出嘅同事塞咗利是畀我。
其實呢句祝賀說話好敷衍，我又未發財，恭乜喜。但你又未同我熟悉到要諗句適合你嘅句子…所以…都係講句多謝算數。
「祝你心想事成。」突然一把有如天使咁嘅聲音從背後響起。
我擰轉頭，果然不出我所料，係我女神Suyi。
「多、多謝！祝妳…」當我諗緊一句又有心思又印象深刻又有少少食字幽默嘅祝賀說話畀Suyi時，我後尾枕好似畀人突然間拍咗一下咁…
女神佢派利是畀我…？即係代表…佢結咗婚？！
「恭喜發財…」呢一刻我講嘅，唔係祝賀，而係絕望。
點解啊！點解Suyi要欺騙我感情啊？我真係唔明白，如果佢結咗婚，佢就唔應該畀假希望我…
「唔該～你拎住張Fax好似係我嫁～」上年，Suyi曾經微笑咁同我講，當時我仲以為佢暗戀我。
個個朋友都話我自作多情，但我唔信！我堅持我嘅信念，簡直好似一個夕陽武士咁！我已經三十二歲喇！傳說中三十歲保持童貞就會變成魔法師，但係肯定自己已經轉職埋做大法師添。朋友仲串我，保險套應該直頭印我個樣落去，睇見我個樣就乜mood都無曬，仲唔避孕啊？！
呢封利是，我覺得就好似一張好人卡咁…
Suyi祝我心想事成…我想講，我最想就係做同你結婚嗰個啊！
男人唔壞，女人唔愛。呢個世界好人果然係無好報…
我要墮落！我要做壞人！畀Suyi知道呢封利是對我嘅傷害有幾咁大。我拎住封利是直奔出公司，用曬所有大假，將自己鎖埋喺屋企，熄電腦拔上網線！睇曬電腦入面嘅愛情動作片！從頭到尾！唔飛劇情！
一星期後：
『我係護士仔，咁你係咪我病人？』
『嘻嘻膠黎嘅～』
我睇緊一套自拍片，突然間有人拍門，我走去開門睇嚇發生咩事。
「妳係邊位？」我一開門，就見到一個外國女人，金色頭髮，著住窄身短裙，身材勁爆，十足十電影入面用美色去引誘敵人吐出情報嘅特務。
「我係聯合國特務！就好似電影入面用美色去引誘敵人吐出情報嘅特務！」
「有咩事？」
「年初二放煙花，其中一支煙花同生化武器掉轉咗，支生化武器射上天，病毒極速擴散，全香港都幾乎變曬喪屍，只剩低一小部分生還者，而你係其中之一，但亦係生還者之中唯一一個男人…」
如果我無get錯呢個識講中文嘅外國特務嘅意思…即係話呢一個星期入面，我喺屋企瘋狂睇AV嘅同時，香港人就被喪屍搞到差唔多滅絕？！
但我一直宅喺屋企，所以先避過一劫？！
「點解會死剩我一個？其他人唔識喺屋企避難咩？」我。
「根據情報，係因為你哋香港人太鍾意返工，就算有喪屍都堅持要返工所以搞成咁。」特務。
「但有乜可能煙花同生化武器會掉轉呢？」簡直係荒謬，唔通運送生化武器嘅車用煙花做掩飾咩？
「因為運送生化武器嘅車用煙花做掩飾，所以運送煙花工人掉轉咗。」
「咁妳想點…」
「你而家係人類能否繁衍落去嘅關鍵，我任務係護送你去地下避難所，落到去你只需要同其他生還者交配就可以！」
「妳意思係，我只要同女人交配，就會成為拯救人類嘅英雄…？」
「無錯！係最正義嘅英雄！如果你唔信，我可以即刻同你交配咗先！」特務講完之後就即刻脫低身上條裙。
「正義嘅…英雄…？」
「…」
「…」
「…」
「好！我跟妳走…」
特務著返件衫，我跟住佢落樓下，去到大堂佢打開門，我一腳踢佢出去，再大嗌：
「喪屍！喪屍！呢度有條鬼妹特務啊！快啲黎食咗佢！」
「女人啊～」「女人啊～」「女人～」「女人～」
一眨眼，成堆喪屍大聲叫囂一湧而上，撲倒個女特務，將佢食到渣都無得剩…
「I『m a bad guy you mother fucker！」
我將一個女人推出去畀喪屍咬，我一定係壞男人。
不過眼前仲有一個問題需要解決。就係呢群食人唔眨眼，全身被病毒佔據住嘅喪屍，發現咗我嘅存在！
大堂閳門好輕易咁畀班喪屍撞開咗，仲將我重重包圍住。
再見喇呢個世界，再見喇Suyi…
「毒啊…」「毒啊…」「毒啊…」
「毒啊…」「毒啊…」「毒過毒氣丸啊…」
班喪屍好似見到鬼咁急急腳逃走…
咩事啊喂…
我仲洗唔洗去避難…？